لوک سبھا اسپیکر اوم برلا نے کہا کہ ہر ملک کی اپنی خود مختاری ہوتی ہے جس کا دوسرے ممالک کو احترام کرنا چاہیے۔ کسی بھی ملک کو دوسرے ممالک کے اندرونی معاملات کو اپنی پارلیمنٹ میں اٹھانے کی اجازت نہیں ہونی چاہیے جب تک کہ وہ معاملات اس ملک کے مفادات کو متاثر نہ کریں۔

برلا نے یہ باتیں جمعرات کو برطانیہ کے ہاؤس آف کامنز کے اسپیکر سر لنڈسے ہوئلے کے ساتھ دو طرفہ بات چیت میں کہی۔ وہ  جی۔20ممالک کے ارکان پارلیمان کے اسپیکر کے شیکھر سمیلن (پی۔20 میں ہندوستانی پارلیمانی وفد کی  قیادت کر رہے ہیں ۔

دونوں رہنماؤں نے اس بات پر اتفاق کیا کہ دونوں پارلیمنٹ کے ارکان پارلیمانی سفارت کاری کے ذریعے خیالات کا تبادلہ کریں اور یہ جاننے کی کوشش کریں کہ کس طرح جمہوری اداروں کو عوام کے مفاد میں مضبوط کیا جا سکتا ہے۔

اس سے پہلے، آج کے پہلے سیشن میں، برلا نے "وبائی مرض سے پیدا ہونے والے سماجی اور روزگار کے بحران کا سامنا کرنے کے لیے کارروائی" کے موضوع پر اپنے خیالات کا اظہار کیا۔ انہوں نے کہا کہ عالمی مسائل کو حل کرنے کے لیے ہمیں پوری دنیا کو ایک خاندان سمجھتے ہوئے ایک مربوط حکمت عملی تیار کرنی ہوگی اور اس مقصد کے حصول کے لیے تمام پارلیمنٹ کو مل کر کوششیں کرنا ہوں گی۔ انہوں نے اس بات پر زور دیا کہ ہمیں ایسی ترقیاتی پالیسیاں بنانی چاہئیں جس سے معاشرے کے تمام طبقات کو فائدہ پہنچے۔ انہوں نے یہ بھی کہا کہ ان ترقیاتی پالیسیوں پر کثیر الجہتی فورموں پر وسیع پیمانے پر تبادلہ خیال کیا جانا چاہیے تاکہ سماجی اور معاشی انصاف کے اصولوں پر مبنی ایک مناسب اور مشترکہ عالمی روڈ میپ تیار کیا جا سکے۔

وبا کے اثرات کا ذکر کرتے ہوئے لوک سبھا اسپیکر نے کہا کہ ہندوستان کی معیشت کے کئی شعبے کووڈ 19 سے منفی طور پر متاثر ہوئے ہیں۔ انہوں نے کہا کہ اس وبائی مرض کا مؤثر طریقے سے مقابلہ کرنے کے لیے  بھارت میں زندگی اور معاش دونوں کو بچانے پر کوششیں مرکوز ہیں۔