نئی دہلی،  17/اکتوبر2021 ۔ نائب صدر جمہوریہ جناب ایم وینکیا نائیڈو نے آج ماحولیات کے تحفظ کے لئے عوامی تحریک چلائے جانے کی اپیل کی اور لوگوں سے درخواست کی کہ وہ ماحولیات کے تحفظ سے متعلق متعدد سرگرمیوں میں رضاکارانہ طور پر حصہ لیں۔

جناب نائیڈو نے خاص طور پر نوجوانوں سے اپیل کی کہ وہ صف اوّل میں رہ کر ماحولیات سے متعلق تحریکوں کی سرگرم قیادت کریں اور دوسروں کو پائیدار طور طریقوں کو اختیار کرنے کے لئے راغب کریں۔ انھوں نے کہا کہ نوجوانوں کو لوگوں کے درمیان یہ نکتہ اجاگر کرنا چاہئے کہ اگر ہم قدرت کا خیال رکھیں گے تو قدرت اس کے بدلے میں عالم انسانیت کا خیال رکھے گی۔

جناب نائیڈو ’نرسری راجیانکی رراجو‘ نام کی کتاب کے اجراء کے موقع پر اظہار خیال کررہے تھے۔ یہ کتاب آنجہانی جناب پَلا وینکنا کی زندگی کی کہانی پر مشتمل ہے۔ وہ یہ شخص ہیں جن کے سر پر آندھراپردیش کے گاؤں کاڈیم کو پلانٹ نرسیوں کے ایک مقبول مرکز میں تبدیل کردینے کا سہرا باندھا جاتا ہے۔

نائب صدر جمہوریہ نے ’’گرین بھارت‘‘ کے لئے جناب وینکنا کی انتھک کوششوں کے لئے ان کی ستائش کی۔ انھوں نے کہا کہ ملک بھر سے 3000 سے زیادہ پودوں کی انواع جمع کرنے والے جناب وینکنا کا یہ یقین تھا کہ اگر ہر گھر سرسبز و شاداب ہوجائے تو اس کے نتیجے میں پورا ملک سرسبز و شاداب ہوجائے گا۔ جناب نائیڈو نے کہا کہ جناب پَلا وینکنا کی زندگی کی کہانی آنے والی نسلوں کے لئے باعث تحریک ہے۔

تیزتر شہر کاری اور جنگلوں کی کٹائی کے اثرات کا ذکر کرتے ہوئے جناب نائیڈو نے کہا کہ حالیہ وقتوں میں انتہائی نوعیت کے موسمی حالات بہ کثرت پیش آرہے ہیں، جن میں دنیا کے مختلف حصوں میں سیلاب کے ریلے اور تودے کھسکنے کے واقعات شامل ہیں۔ انھوں نے کہا کہ یہ اس بات کے واضح اشارے ہیں کہ موسمیاتی تبدیلی ایک حقیقت ہے اور یہ معاملہ اب ایسا نہیں رہ گیا ہے جیسا پہلے ہوا کرتا تھا۔

اس طرح کے موسمی واقعات کو کم کرنے کے لئے جناب نائیڈو نے کہا کہ آگے بڑھتے ہوئے یہ لازمی ہے کہ ہم قدرت کے ساتھ خوش اسلوبی سے جئیں۔ ہم اپنی ترقیاتی ضرورتوں کو ماحولیاتی تحفظ کے ساتھ متوازن کریں اور ہر آدمی پائیدار زندگی کی اہمیت کو سمجھے، اسے یقینی بنائیں۔ جناب نائیڈو نے کہا کہ بامعنی ترقی تبھی ممکن ہے جب اس کے ماحولیات پر پڑنے والے اثرات کو پیش نظر رکھا جائے۔

اس موقع پر انھوں نے ’ہریتھاہرم‘ کے تحت شجرکاری کو ایک مہم کے طور پر لینے کے لئے تلنگانہ حکومت کی ستائش کی۔ انھوں نے مشورہ دیا کہ سبھی ریاستی حکومتوں کو، اسکولی سطح سے بچوں میں ماحولیات کے تحفظ اور شجرکاری کے تئیں بیداری پیدا کرنے کے لئے پہل کرنی چاہئے۔

تلنگانہ کے وزیر داخلہ جناب محمد محمود علی، سابق رکن پارلیمنٹ جناب اُنڈاولّی ارون کمار، معروف ماہر نفسیات ڈاکٹر بی وی پٹا بھیرام، ایمیسکو بکس کے سی ای او جناب وجے کمار، صحافی جناب کے رام چندر مورتی، رائیتھو نیستھام کے بانی جناب یڈلاپلی وینکٹیسور راؤ، کتاب کے مصنف جناب ولیشور، پلا وینکنا کے اہل خانہ اور دیگر اس موقع پر موجود تھے۔