نروتم مشرا نے کہا- کانگریس صرف سوشل میڈیا کی پارٹی ہے

بھوپال، 2 نومبر (انڈیا نیرٹیو)

مدھیہ پردیش کی ایک لوک سبھا اور تین اسمبلی سیٹوں پر ضمنی انتخابات کی ووٹوں کی گنتی کے رجحانات کے بعد سیاسی بیان بازی شروع ہوگئی ہے۔

وزیر داخلہ ڈاکٹر نروتم مشرا نے رجحان پارٹی کے حق میں آنے پر کہا کہ کانگریس صرف سوشل میڈیا کی پارٹی ہے۔ کمل ناتھ سے لے کردگ وجے سنگھ سمیت تمام لیڈران صرف سوشل میڈیا پر ہی ایکٹو رہتے ہیں۔ اظہار افسوس کرنے سے لے کر بی جے پی پر الزام عائد کرنے تک سوشل میڈیا پر ہی نظر آتے ہیں۔ سڑک پر کبھی نظر نہیں آتے۔ انتخابات آتے ہی یہ سڑک پر نمودار ہوتے ہیں اور انتخابات ختم ہوتے ہی غائب ہوجاتے ہیں۔ یہ پارٹی کے کارکنان کی محنت اور لوگوں کی محبت کی جیت ہے۔ پارٹی کے ہر کارکن نے محنت کی ہے۔ عوام کے درمیان میں گئے، ان سے بات چیت کی اور ان کی پریشانیوں کو جانا۔ مہنگائی کا مدعا ہمیشہ رہتا ہے، لیکن عوام کو پتہ ہے کہ ایمانداری سے کوشش کون کر رہا ہے۔ یہی وجہ ہے کہ عوام بی جے پی کے ساتھ ہے۔

وہیں سابق وزیر اور بھوپال سے کانگریس ایم ایل اے نے بھی پلٹوار کیا۔ انہوں نے کہا کہ ابھی تک جو بھی رجحان آرہے ہیں، وہ اطمینان بخش نہیں ہیں، لیکن یہ بی جے پی کی جیت نہیں بلکہ اقتدار اور طاقت کے زور کا اثر ہے۔ بی جے پی نے یوپی سے غنڈوں کو بلا کر یہاں پر ان کا استعمال کیا۔ اقتدار کا استعمال کرتے ہوئے ملازمین اور افسران کو ڈرایا دھمکایا گیا۔ زبردستی بی جے پی کے حق میں ماحول بنایا گیا۔ اسی کا نتیجہ یہاں نظر آرہا ہے۔جہاں لوگ بی جے پی کے بہکاوے میں نہیں آئے، وہاں نتیجہ ان کے برعکس ہے۔ ہم عوام کے ساتھ اور ان کے اعتماد کے ساتھ انتخابات لڑے ہیں۔ کمل ناتھ کے ساتھ پوری پارٹی اور ہر کارکن پوری ذمہ داری سے کھڑا ہے۔