اتر پردیش، اعظم گڑھ میں ریاستی یونیورسٹی کا سنگ بنیاد رکھنے کے لیے آئے مرکزی وزیر داخلہ امت شاہ نے ہفتہ کو سماج وادی پارٹی (ایس پی) کے سربراہ اکھلیش یادو کی سخت الفاظ میں تنقید کی۔ انہوں نے کہا کہ سابقہ حکومتوں نے اعظم گڑھ کو دہشت گردی کی آماجگاہ بنادیا تھا۔ لیکن موجودہ یوگی حکومت نے آج یہاں ماں سرسوتی کا مندر بنانے کا کام کیا ہے۔ یوگی حکومت نے ریاست کو مافیا سے پاک کر دیا ہے۔
جلسہ عام سے خطاب کرتے ہوئے شاہ نے کہا کہ یہ تبدیلی کی شروعات ہے۔ اعظم گڑھ کو ملک دشمن سرگرمیوں کی آماجگاہ بنا کر رکھا گیا تھا۔ اب اس ضلع کے نوجوان تعلیم حاصل کر کے ملک میں اپنا نام روشن کریں گے اور انہیں روزگار ملے گا۔
اسٹیٹ یونیورسٹی کا نام مہاراجہ سہیل دیو کے نام پر رکھا جائے گا
امت شاہ نے وزیر اعلیٰ یوگی سے کہا کہ وہ ایک مشورہ دینا چاہتے ہیں کہ مہاراج سہیل دیو نے اتر پردیش سے بیرونی حملہ آوروں کو بھگانے کا کام کیا ہے۔ اس لیے اس ریاستی یونیورسٹی کا نام مہاراجہ سہیل دیو کے نام پر رکھا جانا چاہیے۔ انہوں نے کہا کہ سال 2017 کے منشور میں دس نئی یونیورسٹیاں بنائے جانے کی بات کہی گئی تھی اور آج خوشی ہے کہ اعظم گڑھ میں دسویں یونیورسٹی کے قیام کا کام مکمل ہو گیا ہے۔
انہوں نے 30 میڈیکل کالج بنانے کا وعدہ کیا تھا وہ پورا کر دیا گیا ہے۔ جب کہ دس میڈیکل کالج 70 سال میں بنائے گئے۔ انہوں نے کہا کہ اس کے علاوہ بھی کئی کالج کھولے گئے۔ کئی اعلیٰ تعلیمی مراکز قائم کیے گئے۔ انہوں نے کہا کہ وزیر اعظم نریندر مودی نئی تعلیمی پالیسی لائے ہیں، اسے لاگو کرنا مرکزی وزیر دھرمیندر پردھان کا کام ہے۔
اتر پردیش میں پانچ برس میں بڑی تبدیلی آئی ہے
وزیر داخلہ امت شاہ نے کہا کہ وزیر اعظم نریندر مودی اور وزیر اعلیٰ یوگی آدتیہ ناتھ کی قیادت میں اتر پردیش میں پانچ برس میں کافی تبدیلی آئی ہے۔ پہلے یہاں ذات پرستی، خاندان پرستی، خوشامد چلتی تھی۔ ہر کسی کو انصاف نہیں ملتا تھا لیکن ریاست کے وزیر اعلیٰ یوگی آدتیہ ناتھ نے اب اس پر مکمل روک لگا دی ہے۔ پہلے اتر پردیش معیشت کے معاملے میں چھٹے نمبر پر تھا، آج دوسرے نمبر پر ہے۔ ریاست کی جی ڈی پی پہلے دس لاکھ 90 ہزار کروڑ تھی۔ آج 21 کروڑ 31 ہزار کروڑ کا ہے۔ بے روزگاری کی شرح 70.5 تھی۔ اسے کم کرتے ہوئے اب یہ 4.01 فیصد ہے۔ میڈیکل کالج دس تھے آج 40 ہیں۔ آج کسانوں کا اناج خریدنے کا کام ہو رہا ہے۔ پہلے ریاست میں چار ہوائی اڈے تھے، آج آٹھ ہو گئے ہیں۔ پہلے دو آدھے تکمیل شدہ ایکسپریس وے تھے، آج پانچ نئے بنائے گئے ہیں۔ یہ سب وزیر اعلیٰ یوگی آدتیہ ناتھ کی حکومت میں پانچ برس میں ہوا اور سب سے بڑا کام جو اتر پردیش میں ہوا ہے وہ مافیا راج سے چھٹکارا حاصل ہوا ہے۔
الیکشن آتے ہی اکھلیش یادو کو جناح نظر آنے لگے
شاہ نے مزید کہا کہ چونکہ الیکشن قریب ہے۔ ایس پی کے قومی صدر اکھلیش یادو کو جناح بہت اچھے لگنے لگے۔ انہوں نے ہجوم سے پوچھا کہ یہاں بیٹھا کوئی بھی شخص جناح میں عظمت دیکھتا ہے۔
