بالی ووڈ سے لے کر ہالی ووڈ تک اپنی صلاحیتوں کا لوہا منوانے والی اداکارہ پرینکا چوپڑا اپنے سوشل میڈیا بائیو سے جوناس کا نام ہٹانے کے بعد سرخیوں میں آگئی ہیں۔ جہاں یہ قیاس آرائیاں کی جا رہی ہیں کہ ان کے اور ان کے شوہر نک جوناس کے درمیان کچھ تنازعہ چل رہا ہے، وہیں پرینکا اور نک کے بارے میں سوشل میڈیا پر میمس کا سیلاب آگیا ہے۔

ایک سوشل میڈیا صارف نے سوشل میڈیا پر ایک کولاج شیئر کیا ہے، جس میں نک بہت جوان نظر آرہے ہیں، جب کہ پرینکا کی تصویر مس ورلڈ مقابلے کے دوران لی گئی ہے۔ کولاج کو شیئر کرتے ہوئے صارف نے حال ہی میں ریلیز ہونے والے گانے 'بچپن کا پیار میرا بھول نہیں جانا' سے چند سطور لکھی ہیں۔ دوسری جانب ایک اور صارف نے نک کی اینیمیٹڈ تصویر بنائی ہے، جس میں نک چھوٹے نظر آرہے ہیں اور پرینکا ان کا ہاتھ پکڑ کر کہہ رہی ہیں 'اب گھر جاؤ بیٹا، ہو گیا!'

غور طلب ہے کہ پرینکا چوپڑا کی جانب سے اچانک جوناس سر نیم ہٹانے سے مداحوں میں قیاس آرائیوں کا دور شروع ہو گیا ہے۔ پرینکا کے ایسا کرنے کی وجہ کوئی نہیں جانتا۔ پرینکا چوپڑا نے دسمبر 2018 میں اپنے سے 10 سال چھوٹے نک جوناس سے شادی کی تھی اور شادی کے فوراً بعد پرینکا نے جوناس کنیت اختیار کر لی تھی تاہم اب انہوں نے وہی کنیت (سر نیم) ہٹا دی ہے جس کے بعد مباحثے کا بازار گرم ہے۔