اتر پردیش شیعہ وقف بورڈ کے سابق چیئرمین وسیم رضوی نے اسلام چھوڑ کر، سناتن دھرم اپنایا

تبدیلی مذہب کے بعداپنانام ہربیر نارائن سنگھ تیاگی رکھا

اب صرف ہندوتوا کے لیے کریں گے کام: رضوی

اترپردیش شیعہ وقف بورڈ کے سابق چیئرمین وسیم رضوی نے پیر کو اسلام چھوڑ کر ہندو مذہب اختیار کرلیا۔ڈاسنا دیوی مندر کے مہنت اور جونا اکھاڑہ کے مہامنڈلیشور نرسمہانند گری مہاراج نے انہیں سناتن دھرم قبول کرایا اور اس سے متعلق ضروری رسمی کارروائیاں مکمل کیں۔

وسیم رضوی نے اب اپنا نام بدل کر ہربیر نارائن سنگھ تیاگی رکھ لیا ہے۔ تبدیلی مذہب کی تمام رسمی کارروائیاں مکمل کرنے کے بعد وسیم نے کہا کہ آج سے وہ صرف ہندوتوا کے لیے کام کریں گے۔

وسیم رضوی سے ہربیر نارائن بننے پر انہوں نے کہا، ' تبدیلی مذہب کی بات نہیں ہے۔ مجھے اسلام سے نکال دیا گیا ہے، تو یہ میری مرضی ہے،میں جس مذہب کوچاہوں اختیارکروں۔سناتن دھرم دنیا کا پہلا مذہب ہے اور اس میں اچھائی پائی جاتی ہے۔ اس مذہب میں انسانیت پائی جاتی ہے۔

انہوں نے کہا کہ اسلام کے بارے میں اتنا کچھ پڑھ کر ہم سمجھتے ہیں کہ اسلام کوئی مذہب نہیں ہے۔ جب ہمیں اسلام سے نکال دیاگیا اور ہر جمعہ کے بعد ہماراسر کاٹنے کوکہا گیا تو ہم اسلام کو چھوڑ کر سناتن دھرم کو قبول کر رہے ہیں۔

اس موقع پر یتی نرسمہانند نے کہا کہ وسیم ایک انسان دوست اور دلیر انسان ہیں۔ انہوں نے کہا کہ ہندوؤں کو چاہیے کہ وہ وسیم رضوی کا دل و جان سے ساتھ دیں۔ انہوں نے کہا کہ سناتن دھرم پر چلنے والے لوگ وسیم رضوی کا استقبال کریں گے۔