سال2014 کے بعد 2021 میں سب سے زیادہ فلسطینی شہید ہوئے

انسانی حقوق کی اسرائیلی تنظیم کے مطابق 2021 میں اسرائیل کے ہاتھوں 313 فلسطینی شہید ہوئے جن میں بڑی تعداد بچوں کی بھی شامل ہے۔بتسیلم نامی انسانی حقوق کے لیے کام کرنے والی تنظیم نے اپنی رپورٹ میں انکشاف کیا ہے کہ 2021 فلسطینیوں کے لیے خونی سال رہا جس میں 71 بچوں سمیت 313 فلسطینی شہید ہوئے جب کہ زخمی ہونے والوں کی تعداد کئی گنا زیادہ ہے۔

بتسیلم کی رپورٹ کے مطابق 2014 کے بعد فلسطینیوں کے لیے سب سے ہلاکت خیز سال 2021 رہا۔ رپورٹ کے مطابق اسرائیلی سیکورٹی فورسز کی جانب سے“مہلک، غیر اخلاقی اور کھلے عام فائرنگ کی پالیسی”نے کئی بچوں کی بھی زندگیاں چھین لیں۔سب سے زیادہ شہادتیں مئی 2021 میں حماس کے ساتھ ہونے والی جنگ کے دوران ہوئیں۔

 رپورٹ کے مطابق اسرائیلی فورسز نے 2021 میں مشرقی بیت المقدس اور مقبوضہ مغربی کنارے میں سینکڑوں رہائشی مکانات کو بھی مسمار کیا جس سے 463 بچوں سمیت 895 فلسطینی بے گھر ہوگئے۔ یاد رہے اس سال فلسطینیوں کے گھروں کی مسماری پانچ سال کی بلند ترین سطح پر رہی ہے۔

عمارتوں کے اجازت نامے نہ ہونے پر اسرائیل فلسطینیوں کے مکانات مسمار کرتا رہتا ہے، جب کہ فلسطینیوں کے پاس چاہے ان کی اپنی زمین ہی کیوں نہ ہو، اجازت نامے حاصل کرنا تقریباً ناممکن بنا دیا گیا ہے، جس کے باعث فلسطنیوں کے پاس بغیر اجازت ناموں کے تعمیرات کرنے کے علاوہ کوئی اور راستہ نہیں بچتا۔