نئی دہلی، 18 جنوری (انڈیا نیرٹیو)

ملک میں ایک بار پھر کورونا کیسز تیزی سے بڑھ رہے ہیں۔ منگل کی صبح تک گزشتہ 24 گھنٹوں میں دو لاکھ 38 ہزار 18 نئے کورونا مریض سامنے آئے ہیں۔ اس دوران صحت یاب ہونے والے مریضوں کی تعداد ایک لاکھ 57 ہزار 421 ہے۔جب کہ 310 کورونا متاثرین کی موت ہو چکی ہے۔

منگل کو مرکزی وزارت صحت کے جاری کردہ اعداد و شمار کے مطابق ملک میں کورونا سے صحت یاب ہونے والوں کی کل تعداد تین کروڑ 53 لاکھ 94 ہزار 882 ہے۔ اس دوران کورونا سے صحت یاب ہونے کی شرح 94.09 فیصد پر آگئی ہے۔ ملک میں فعال مریضوں کی تعداد 17 لاکھ 36 ہزار 628 ہوگئی ہے۔ روزانہ انفیکشن کی شرح 14.43 فیصد تک پہنچ گئی ہے۔

آئی سی ایم آر کے مطابق گزشتہ 24 گھنٹوں میں 16 لاکھ سے زیادہ ٹیسٹ کیے گئے۔ اب تک کل 70 کروڑ 54 لاکھ ٹیسٹ کیے جا چکے ہیں۔

اومیکرون کی دہشت: ملک میں 8891 متاثرین کی تصدیق

ملک میں کورونا کے نئے ویرینٹ اومیکرون کی رفتار مسلسل بڑھتی جارہی ہے۔ ملک بھر میں اومیکرون کے 8 ہزار 891 کیسز کی تصدیق ہوئی ہے۔ یعنی گزشتہ 24 گھنٹوں میں اومیکرون کے نئے کیسز میں 8.31 فیصد کا اضافہ ہوا ہے۔ اب تک ملک میں اومیکرون سے ایک شخص کی ہلاکت کی تصدیق ہوئی ہے۔

مرکزی وزارت صحت نے منگل کو جاری کردہ اعداد و شمار میں کہا کہ اومیکرون اب ملک کی 28 ریاستوں اور مرکز کے زیر انتظام علاقوں میں پھیل چکا ہے۔ اومیکرون کے سب سے زیادہ کیس مہاراشٹر میں رپورٹ ہو رہے ہیں۔

کورونا سے جنگ: ملک میں 158.04 کروڑ ویکسین لگائی گئیں

کورونا کے خلاف جنگ میں موثر ویکسی نیشن مہم کے تحت ملک میں گزشتہ 24 گھنٹوں میں 80 لاکھ کے قریب ویکسین لگائی گئیں۔ اس کے ساتھ ملک میں اب تک 158.04 کروڑ ویکسین لگائی جا چکی ہیں۔

مرکزی وزارت صحت کے مطابق منگل کی صبح تک 158.16 کروڑ ویکسین کی خوراکیں ریاستوں اور مرکز کے زیر انتظام علاقوں کو مفت فراہم کی گئی ہیں۔ ریاستوں کے پاس اب بھی ویکسین کی 13.25 کروڑ خوراکیں موجود ہیں۔