جیا نے 36 کلومیٹر کا فاصلہ8 گھنٹے 40 منٹ میں تیر کر تاریخ رقم کی تھی

ہندوستانی بحریہ کے جنگی جہاز آئی این ایس کنجلی پر تعینات مدن رائے کی بیٹی جیا رائے کو پردھان منتری راشٹریہ بال پرسکار-2022 سے نوازا گیا ہے۔ نیوی چلڈرن اسکول، ممبئی کی آٹھویں جماعت کی اس طالبہ کو تیراکی میں اس کی غیر معمولی کامیابی کے لیے نوازا گیا ہے۔

نیشنل چلڈرن ایوارڈ 18 سال سے کم عمر کے بچوں کو دیا جانے والا سب سے بڑا ایوارڈ ہے۔ جیا رائے نے کئی سمندری راستوں پر تیراکی کرکے قوم کا سر فخر سے بلند کیا ہے۔ جیا انڈیا اوپن واٹر پیرا سوئمر اور اوپن واٹر سوئمنگ میں عالمی ریکارڈ ہولڈر ہے۔

بحریہ کے اہلکار سیلر مدن رائے نے بتایا کہ ان کی 12 سالہ بیٹی جیا رائے نے 17 فروری 2021 کو باندرہ-ورلی سی لنک سے گیٹ وے آف انڈیا تک 36 کلومیٹر کا فاصلہ تیرکر8 گھنٹے 40 منٹ میں طے کر کے تاریخ رقم کی تھی۔ جیا نے صبح 3.50 بجے باندرہ-ورلی سی لنک سے تیراکی شروع کی اور 12.30 بجے گیٹ وے آف انڈیا پر مکمل کی۔ اس نے اپنا تیراکی کا کارنامہ آٹزم اسپیکٹرم ڈس آرڈر (اے ایس ڈی) کے بارے میں بیداری پیدا کرنے کے لیے وقف کیا ہے۔

اس سے قبل، جیا رائے نے 15 فروری 2020 کو ایلیفنٹا جزیرے سے گیٹ وے آف انڈیا تک کھلے پانی میں 14 کلومیٹر کا فاصلہ طے کیا تھا۔ اس نے 3 گھنٹے 27 منٹ اور 30 سیکنڈ میں تیراکی کرنے والی کم عمر ترین لڑکی کے طور پر عالمی ریکارڈ قائم کیا۔