نئی دہلی،  15/فروری 2022 ۔ صحت و کنبہ بہبود اور کیمیاجات و کھادوں کے مرکزی وزیر ڈاکٹر من سکھ مانڈویہ نے سائنس و ٹیکنالوجی کے محکمہ کے تحت کام کرنے والے ٹیکنالوجی ڈیولپمنٹ بورڈ کی ایک میٹنگ کی صدارت کی، جس نے ایک پرزنٹیشن دیا، جس میں اس طریقہ کار کو واضح کیا گیا جس کے ذریعے ٹیکنالوجی ڈیولپمنٹ بورڈ، صحت و کنبہ بہبود کی وزارت  اور کیمیاجات و کھادوں کی وزارت، تحقیق و ترقی سے متعلق کاموں کو باہمی تعاون کو فروغ دے سکتا ہے۔

 

اس موقع پر اظہار خیال کرتے ہوئے ڈاکٹر من سکھ مانڈویہ نے کہا کہ ہمیں آتم نربھر بھارت کے جذبے کے ساتھ تحقیقی کاموں کو فروغ دینے کے لئے مل جل کر کام کرنا چاہئے۔ کیمیاجات کے شعبے کے علاوہ ہمیں فارما اور صحت کے میدان میں ایسے شعبوں کی نشان دہی کرنی چاہئے جہاں ترقی کے لئے کام کیا جاسکے اور باہمی تعاون کے ذریعے دیسی ٹیکنالوجی کو اپنایا جاسکے۔

بورڈ کے کاموں کو وسعت دینے اور اس کے کام کاج کو مزید مؤثر بنانے کی ضرورت پر زور دیتے ہوئے ڈاکٹر من سکھ مانڈویہ نے ٹیکنالوجی ڈیولپمنٹ بورڈ کو مشورہ دیا کہ وہ بھارت کے سبھی صنعتی کلسٹروں تک پہنچے اور چھوٹے و بڑے صنعت کاروں کے درمیان بیداری پیدا کرے۔ انھوں نے مزید کہا کہ ہمیں چاہئے کہ ہم انھیں مطلع کریں اور انھیں سکھائیں کہ کیسے ٹیکنالوجی ڈیولپمنٹ بورڈ اختراعاتی دیسی ٹیکنالوجی کے فروغ میں کیسے ان کی مدد کرسکتا ہے۔ اس سے مثبت نتائج برآمد ہوں گے اور اس سے خودکفیل بھارت کے وزیر اعظم جناب نریندر مودی کے ویژن کو عملی شکل دینے کی سمت بڑھنے میں ملک کی مدد ملے گی۔

 

میٹنگ میں یہ فیصلہ بھی کیا گیا کہ صحت و کنبہ بہبود کی وزارت اور کیمیاجات و کھادوں کی وزارت کے متعلق کاموں میں تحقیق و ترقی (آر اینڈ ڈی) کو فروغ دینے کے سلسلے میں دونوں وزارتوں کے متعدد محکمے ٹیکنالوجی ڈیولپمنٹ بورڈ اور دیگر حصص داروں کے ساتھ برابر میٹنگیں کریں گے۔ وہ متعلقہ شعبوں میں دیسی ٹیکنالوجی کے فروغ کے مواقع کا پتہ لگائیں گے اور ایسے شعبوں کی بھی نشان دہی کریں گے جہاں باہمی تعاون کے امکانات موجود ہیں۔

ٹیکنالوجی ڈیولپمنٹ بورڈ کے بارے میں:

بھارت سرکار کی سائنس و ٹیکنالوجی کی وزارت کے تحت ٹیکنالوجی ڈیولپمنٹ بورڈ کا قیام 1996 میں عمل میں آیا تھا، جس کا مقصد درآمد شدہ ٹیکنالوجی کو اپنانے کے عمل کو فروغ دینے کے ساتھ ساتھ دیسی ٹیکنالوجی کو فروغ دینا اور اس کو تجارتی شکل دینا تھا۔ ٹیکنالوجی ڈیولپمنٹ بورڈ ان سرگرمیوں کے لئے تکنیکی اور مالی مدد دستیاب کراتا ہے۔

میٹنگ میں تین وزارتوں کے اعلیٰ اہل کاروں نے شرکت کی، جن میں مرکزی صحت سکریٹری جناب راجیش بھوشن، محکمہ فارما کی سکریٹری محترمہ ایس اَپرنا، کیمیکلز اور پیٹرو کیمیکلز محکمہ کی سکریٹری محترمہ آرتی آہوجا، سائنس و ٹیکنالوجی محکمہ کے سکریٹری ڈاکٹر شری وری چندر شیکھر اور ٹیکنالوجی ڈیولپمنٹ بورڈ کے چیئرمین ڈاکٹر شری وری چندر شیکھر اور ٹیکنالوجی ڈیولپمنٹ بورڈ کے سکریٹری راجیش کمار پاٹھک شامل ہیں۔