نئی دہلی، 28 فروری (انڈیا نیرٹیو)
وزیر اعظم نریندر مودی نے پیر کے روز کہا کہ 'پی ایم گتی شکتی' بہتر تال میل اور مانیٹرنگ کے ذریعے ملک میں مزید جدید انفراسٹرکچر تیار کرنے کے لیے نیشنلماسٹر پلان میں بڑا کردار ادا کرے گا۔ پی ایل آئی اقدام کا ذکر کرتے ہوئے، وزیر اعظم نے نجی شعبے سے ملک کے بنیادی ڈھانچے میں سرمایہ کاری کرنے کی بھی اپیل کی۔
وزیر اعظم مودی آج گتی شکتی کے وژن اور مرکزی بجٹ 2022 کے ساتھ اس کے تال میل پر ایک ویبینار سے خطاب کر رہے تھے۔ بجٹ کے بعد مختلف وزارتوں کی جانب سے منعقد کیے جانے والے ویبنارز کے سلسلے کی یہ چھٹی کڑی تھی، جس سے وزیراعظم نے خطاب کیا۔
ویبینار میں وزیر اعظم نے کہا کہ اس سال کے بجٹ نے 21ویں صدی میں ہندوستان کی ترقی کی رفتار (گتی شکتی) کو متعین کیا ہے۔ انہوں نے کہا کہ 'انفراسٹرکچر پر مبنی ترقی' کی یہ سمت ہماری معیشت کی مضبوطی میں غیر معمولی اضافے کا باعث بنے گی جس سے روزگار کے بہت سے نئے مواقع پیدا ہوں گے۔
وزیر اعظم نے منصوبوں کو مکمل کرنے کے روایتی طریقوں میں اسٹیک ہولڈرز کے درمیان ہم آہنگی کے فقدان کی نشاندہی کرتے ہوئے کہا کہ اس کی وجہ مختلف محکموں کے درمیان واضح مفاہمت کی کمی ہے۔ انہوں نے کہا، "پی ایم گتی شکتی کی وجہ سے، اب ہر کوئی مکمل معلومات کے ساتھ اپنا منصوبہ بنا سکے گا۔ اس سے ملکی وسائل کا زیادہ سے زیادہ استعمال بھی ہو گا۔
بنیادی ڈھانچے کی ترقی پر زور دیتے ہوئے وزیر اعظم نے کہا کہ سال 2013-2014میں حکومت ہند کا براہ راست سرمایہ خرچ تقریباً 2.5 لاکھ کروڑ روپے تھا، جو سال 2022-23 میں بڑھ کر 7.50 لاکھ کروڑ روپے ہو گیا ہے۔ پی ایم گتی شکتی سے بنیادی ڈھانچے کی منصوبہ بندی، عمل آوری اور مانیٹرنگ کو ایک نئی سمت ملے گی۔ اس سے منصوبوں کا وقت اور لاگت بھی کم ہو جائے گی۔
مودی نے کہا، "کوآپریٹو وفاقیت کے اصول کو مضبوط کرتے ہوئے، ہماری حکومت نے اس سال کے بجٹ میں ریاستوں کی مدد کے لیے ایک لاکھ کروڑ روپے کا انتظام کیا ہے۔ ریاستی حکومتیں اس رقم کو ملٹی موڈل انفراسٹرکچر اور دیگر پیداواری اثاثوں کے لیے استعمال کر سکیں گی۔
وزیر اعظم نے کہا کہ اب پی ایم گتی شکتی نیشنل ماسٹر پلان میں 400 سے زیادہ ڈیٹا لیئرز دستیاب ہیں، جو نہ صرف موجودہ اور مجوزہ بنیادی ڈھانچے کے بارے میں بلکہ جنگلاتی زمین اور دستیاب صنعتی دولت کے بارے میں بھی معلومات فراہم کرتی ہیں۔
انہوں نے مزید کہا کہ نجی شعبہ اپنی منصوبہ بندی کے لیے اس کا زیادہ سے زیادہ استعمال کرے اور نیشنل ماسٹر پلان کے حوالے سے تمام اہم معلومات اب ایک پلیٹ فارم پر دستیاب ہیں۔ وزیر اعظم نے ریاستی حکومت سے اپنے پروجیکٹوں اور اقتصادی شعبوں کے لیے پی ایم گتی شکتی نیشنل ماسٹر پلان بنیاد بنانے کے لئے بھی کہا۔
وزیر اعظم نے کہا کہ گتی شکتی بنیادی ڈھانچے کی ترقی کے مرحلے سے لے کر ترقی اور استعمال تک بنیادی ڈھانچے کی تخلیق میں حقیقی پبلک پرائیویٹ پارٹنرشپ کو یقینی بنائے گی۔ مودی نے کہا، "اس ویبینار میں اس بات پر بھی بات ہونی چاہیے کہ نجی شعبہ کس طرح سرکاری مشینری کے تعاون سے بہتر نتائج حاصل کر سکتا ہے۔
