الہ آباد ہائی کورٹ نے متھرا شاہی عیدگاہ مسجد کو کرشنا جنم بھومی کے طور پر تسلیم کرنے کی درخواست کو بحال کر دیا ہے۔ عدالت نے کہا کہ درخواست گزار نے بروقت بحالی کی درخواست دائر کی تھی۔درخواست کی سماعت کی تاریخ 25 جولائی 22 مقرر کی گئی ہے۔

یہ حکم چیف جسٹس راجیش بندل اور جسٹس پرکاش پاڈیا کی ڈویڑن بنچ نے ایڈوکیٹ مہک مہیشوری کی درخواست پر دیا ہے۔ درخواست گزار کا کہنا ہے کہ مندر کو گرانے کے بعد بنائی گئی شاہی عیدگاہ مسجد کو ہٹا کر کرشنا جنم بھومی مندر تعمیر کیا جائے۔ تمام زمین ہندوؤں کے حوالے کر دی جائے۔ کرشن جنم بھومی کو جائے پیدائش ٹرسٹ بنایا جائے۔ اس معاملے میں فیصلہ ہونے تک ہندوؤں کو جنم اشٹمی کے موقع پر عیدگاہ میں جائے پیدائش پر پوجا کر نے کی اجازت دی جانی چاہیے۔

درخواست گزار کا یہ بھی کہنا ہے کہ متھرا کے بادشاہ کنس نے بھگوان کرشن کے والدین کو جیل میں ڈال دیا تھا۔ جہاں شری کرشن کی پیدائش ہوئی تھی۔ مغل دور میں مندر کو گرا کر مسجد بنائی گئی تھی۔ عدالت کی نگرانی میں اے ایس آئی کے ذریعہ سروے اور کھدائی کر کے جائے پیدائش مندر کا سراغ لگانے کا مطالبہ کیا گیا ہے۔

درخواست گزار کا یہ بھی کہنا ہے کہ مسجد اسلام کا لازمی حصہ نہیں ہے۔ عبادت کہیں بھی کی جا سکتی ہے۔ اس لیے متنازعہ زمین ہندوؤں کے حوالے کی جائے۔ تاکہ ہندو آزادانہ طور پر آئین کے آرٹیکل 25 کے بنیادی حقوق کا استعمال کر سکیں اور جائے پیدائش پر پوجا کر سکیں۔