نئی دہلی، 20 مارچ (انڈیا نیرٹیو)

جنتا دل (یو) کے سابق قومی صدر اور سماجوادی لیڈر شرد یادو نے اتوار کو 25 سال بعد دوبارہ راشٹریہ جنتا دل (آر جے ڈی) میں شمولیت اختیار کی۔ لالو پرساد یادو کی قیادت والی آر جے ڈی میں اپنی پارٹی لوک تانترک جنتا دل (ایل جے ڈی) کے انضمام کا اعلان کرتے ہوئے، انہوں نے اسے اپوزیشن اتحاد کی طرف پہلا قدم قرار دیا۔

انضمام کے بعد انہوں نے کہا کہ ان کی پارٹی کا آر جے ڈی میں انضمام اپوزیشن اتحاد کی طرف پہلا قدم ہے۔ یادو نے یہاں کہا کہ بی جے پی کو شکست دینے کے لیے اپوزیشن ملک بھر میں متحد ہو جانا ضروری ہے۔ ابھی تک انضمام ہماری ترجیح ہے،  اس کے بعد سوچیں گے کہ متحدہ اپوزیشن کی قیادت کون کرے گا۔

قبل ازیں آر جے ڈی لیڈر تیجسوی یادو اور راجیہ سبھا کے رکن منوج کمار جھا نے شرد یادو سے ان کی نئی دہلی کی رہائش گاہ پر ملاقات کی۔ بتایا جا رہا ہے کہ تیجسوی نے شرد یادو کو یقین دلایا ہے کہ وہ راجیہ سبھا انتخابات کے لیے آر جے ڈی کے دو امیدواروں میں سے ایک ہوں گے۔ یہ انتخابات جون میں ہونے ہیں۔

قابل ذکر ہے کہ 1997 میں جنتا دل کے صدر کے انتخاب میں لالو پرساد اور شرد کے درمیان رقابت کی وجہ سے شرد کو پارٹی چھوڑنی پڑی تھی۔ اس کے بعد لالو نے آر جے ڈی بنائی۔ اس کے ساتھ ہی جنتا دل نتیش کمار کی تشکیل کردہ سمتا پارٹی میں ضم ہو گئی اور شرد جے ڈی یو کے پہلے صدر بن گئے۔

بہار میں بھارتیہ جنتا پارٹی کے ساتھ اتحاد کی وجہ سے جنتا دل (متحدہ) سے الگ ہونے کے بعد شرد یادو نے مئی 2018 میں لوک تانترک جنتا دل (ایل جے ڈی) کی تشکیل کی۔