<h3 style="text-align: center;">مراکش میں فرانسیسی قونصل جنرل کی گلے میں پھندا ڈال کر خودکشی</h3>
<p style="text-align: right;">پیرس،20نومبر(انڈیا نیرٹیو)</p>
<p style="text-align: right;">مراکشی سیکورٹی حکام نے بتایا ہے کہ فرانس کے ایک قونصل جنرل نے گلے میں پھندا ڈال کر خود کشی کر لی ہے۔العربیہ ڈاٹ نیٹ کے مطابق پولیس نے بتایا کہ شمالی علاقے طنجہ میں فرانسیسی قونصل جنرل ڈونس فرانکوئس کی لاش قونصل خانے کی عمارت کے اندر ان کی رہائش گاہ میں لٹکی ہوئی ملی ہے۔سیکورٹی حکام اس واقعے میں مجرمانہ شبہات کے امکانات کی تحقیقات جاری رکھے ہوئے ہیں۔ مراکشی میڈیا نے تصدیق کی کہ قونصل جنرل نے جمعرات کی صبح اپنی رہائش گاہ کے اندر جہاں وہ تنہا قیام پذیر تھے نجی نوعیت کی پریشانیوں کی بنا پرگلے میں پھندا ڈال کر خودکشی کرلی۔انہوں نے مزید کہا کہ قونصل جنرل نے فرانسیسی وزارت خارجہ کو درخواست دی تھی کہ انہیں سفارتی ذمہ داریوں سے سبکدو ش کیا جائے حالاں کہ انہیں چند ہفتے قبل ہی تعینات کیا گیا تھا۔</p>
<p style="text-align: right;">مراکش میں فرانسیسی سفارت خانے نے جمعرات کے روز اپنے ٹویٹر پیج پر قونصل جنرل کی موت کی خبر کی تصدیق کرتے ہوئے اس کے خاندان سے تعزیت کی ہے تاہم اس خود کشی کے اسباب اور محرکات کے بارے میں تفصیلات فراہم نہیں کی گئیں۔خیال رہے کہ 55 سالہ ڈنس فرانکوئس کو ستمبر کے وسط میں طنجہ میں فرانسیسی قونصل خانے کے سربراہ کے عہدے پر تعینات کیا گیا تھا۔</p>.