کناڈا کے مضافاتی اسٹیشن پر فائرنگ سے ایک ہندوستانی طالب علم ہلاک ہوگیا۔ متوفی طالب علم کارتک واسودیو کناڈامیں مینجمنٹ کا طالب علم تھا۔
معلومات کے مطابق، اتر پردیش کے غازی آباد کا طالب علم کارتک واسودیو مینجمنٹ کی تعلیم حاصل کرنے کناڈاگیا تھا۔ وہ اس سال جنوری میں ہندوستان سے کناڈاپہنچا تھا۔ وہ وہاں مینجمنٹ کی تعلیم کے ساتھ ساتھ ایک ریسٹورنٹ میں کام کرتا تھا۔
ٹورنٹو پولیس سروس کے مطابق ایک مقامی مضافاتی اسٹیشن سے نکلتے وقت اس کے ساتھ لوٹ مار کی کوشش کی گئی۔ اسٹیشن کے داخلی دروازے پر کچھ لوگوں نے اسے گھیر کر کئی گولیاں چلائیں۔ موقع پر ابتدائی طبی امداد کے بعد واسودیو کو اسپتال لے جایا گیا، جہاں وہ زخموں کی تاب نہ لاتے ہوئے چل بسا۔ ٹورنٹو پولیس نے کہا کہ تفتیش کار ان گواہوں کی تلاش کر رہے ہیں جو واقعے کے وقت علاقے میں موجود تھے۔ اس کے علاوہ اسٹیشن اور اس کے آس پاس نصب سی سی ٹی وی کیمروں کی فوٹیج کی بھی جانچ کی جارہی ہے۔
ہندوستان کے وزیر خارجہ ایس جے شنکر نے اس واقعہ پر افسوس کا اظہار کیا ہے۔ ایک ٹویٹ میں انہوں نے طالب علم کے اہل خانہ سے تعزیت کا اظہار کیا اور بھارتی طالب علم کی موت پر دکھ کا اظہار کیا۔
ٹورنٹو میں ہندوستان کے قونصلیٹ جنرل نے ایک ٹویٹ میں کہا، ”ہم ٹورنٹو شوٹنگ کے واقعے میں ایک ہندوستانی طالب علم کارتک واسودیو کی بدقسمتی سے ہلاک ہونے سے صدمے اور دکھ میں ہیں“۔
قونصلیٹ جنرل نے کہا کہ ہم لواحقین کے ساتھ رابطے میں ہیں اور جلد از جلد جسد خاکی کو لواحقین کے حوالے کرنے کے لیے ہر ممکن مدد فراہم کریں گے۔
