ہفتہ کو ہنومان جینتی پر نکالے گئے جلوس کے دوران تشدد کے بعد شمال مغربی دہلی کے جہانگیر پوری علاقے میں امن ہے۔ جہانگیرپوری اور دیگر حساس علاقوں میں اضافی سیکیورٹی اہلکار تعینات کیے گئے ہیں۔
اسپیشل کمشنر، لاء اینڈ آرڈر (زون-1) دیپیندر پاٹھک نے کہا کہ موقع پر امن ہے۔ ہم لوگوں سے بات کر رہے ہیں۔ ہم نے ان سے امن برقرار رکھنے اور افواہوں پر کان نہ دھرنے کی اپیل کی ہے۔ جہانگیرپوری میں حفاظتی انتظامات کے حوالے سے انہوں نے کہا کہ ہم نے کافی تعداد میں پولیس فورس تعینات کر دی ہے اور ہم نے صورتحال کو قابو میں کر لیا ہے۔
ایک پولیس افسر نے بتایا کہ جہانگیرپوری تشدد کیس میں اب تک 14 ملزمان کو گرفتار کیا گیا ہے۔ پولیس کے مطابق ہفتے کے روز ہونے والے تشدد میں آٹھ پولیس اہلکاروں اور ایک عام شہری سمیت نو افراد زخمی ہوئے جنہیں ہسپتال میں طبی امداد دی گئی۔ ایک سب انسپکٹر کو گولی مار دی گئی۔ ان کی حالت مستحکم ہے۔ پولیس نے آئی پی سی کی دفعہ 147، 148، 149، 186، 353، 332، 323، 427، 436، 307، 120 بی کے ساتھ ساتھ 27 آرمس ایکٹ کے تحت مقدمہ درج کیا ہے۔ ذرائع کے مطابق انٹیلی جنس ایجنسیوں کو جہانگیرپوری تشدد کے پیچھے امن و امان خراب کرنے کی بڑی سازش کا شبہ ہے۔
'غیر قانونی تارکین وطن' کے کردار کی تحقیقات کا مطالبہ
دریں اثنا، بی جے پی کی دہلی یونٹ کے رہنماؤں نے ہنومان جینتی کے موقع پر منعقد 'شوبھا یاترا' کے دوران جہانگیر پوری میں ہونے والی جھڑپوں کو 'سازش' قرار دیا اور اس واقعے میں 'غیر قانونی تارکین وطن' کے کردار کی تحقیقات کا مطالبہ کیا۔ بی جے پی دہلی کے ریاستی صدر آدیش گپتا اور پارٹی کے رکن پارلیمنٹ منوج تیواری نے کہا کہ یہ حملہ اچانک نہیں بلکہ ایک سازش تھی۔ بی جے پی لیڈر کپل مشرا نے الزام لگایا کہ جلوس پر پتھراؤ ایک ”دہشت گردانہ حملہ“ تھا۔ انہوں نے مطالبہ کیا کہ غیر قانونی تارکین وطن کو فوری طور پر ملک سے نکالا جائے۔
آدیش گپتا نے کہا کہ وہ مرکزی وزیر داخلہ امت شاہ سے ملاقات کریں گے اور ان سے تشدد کی تحقیقات کا حکم دینے کی اپیل کریں گے۔ انہوں نے یہ بھی پوچھا کہ دہلی میں غیر قانونی طور پر رہنے والے روہنگیا اور بنگلہ دیشیوں کی کچی آبادیوں کو پانی اور بجلی کے کنکشن کیسے دیے گئے۔ انہوں نے ایک ویڈیو پیغام میں کہا، ”میں (وزیر اعلیٰ) اروند کیجریوال سے پوچھنا چاہتا ہوں کہ وہ شہر میں غیر قانونی طور پر رہنے والے روہنگیا اور بنگلہ دیشیوں کو پانی اور بجلی کیوں فراہم کر رہے ہیں۔
بی جے پی لیڈر نے دہلی والوں سے بھی امن برقرار رکھنے کی اپیل کی اور کہا کہ پارٹی کا ایک وفد علاقے کا دورہ کرے گا۔ منوج تیواری نے اس واقعے کے بعد ٹویٹ کیا، 'غیر قانونی تارکین وطن ایک بڑا خطرہ ہیں اور ان کی تحقیقات کی ضرورت ہے کیونکہ وہ ہمارے ملک کی ہم آہنگی کو نقصان پہنچا رہے ہیں، جو ان کی حفاظت کر رہے ہیں اور انہیں یہاں بسنے میں مدد کر رہے ہیں، وہ ایک بڑا خطرہ ہیں۔
دریں اثنا، کپل مشرا، جو مدھیہ پردیش کے کھرگون میں رام نومی پر تشدد بھڑکانے کے الزامات کا سامنا کر رہے ہیں، نے کہا کہ تمام غیر قانونی تارکین کے کاغذات کی جانچ پڑتال کی جانی چاہئے اور انہیں فوری طور پر ہٹا دیا جانا چاہئے۔ ہنومان جینتی پر شوبھا یاترا پر حملہ کوئی اتفاق نہیں تھا بلکہ ایک تجربہ تھا۔ یہ ایک دہشت گردانہ حملہ تھا۔ بنگلہ دیشی دراندازوں کی بستیاں اب حملوں میں ملوث ہیں۔
دہلی کانگریس کے صدر چودھری انیل نے کہا کہ دہلی کا بھائی چارہ برقرار رہنا چاہئے۔ کسی بھی قسم کی افواہوں پر کان نہ دھریں۔ دہلی کو بچانے کے لیے بھائی چارہ اور امن قائم کرنے کے لیے مل کر کام کریں۔ انہوں نے زہریلے بیانات اور اس طرح کے پیغامات کو نظر انداز کرنے کی بھی اپیل کی۔ انہوں نے لوگوں سے اشتعال انگیز اور شعلہ انگیز ٹویٹس یا پیغامات پھیلانے سے گریز کرنے کی بھی اپیل کی ہے۔ اس کے ساتھ ہی انہوں نے ایماندارانہ تحقیقات اور مجرموں کو سزا دینے کا مطالبہ کیا ہے۔
