16 افسران کو پبلک ایڈمنسٹریشن میں بہترین کارکردگی پر پرائم منسٹر ایکسی لینس ایوارڈ  دیا گیا

نئی دہلی، 21 اپریل (انڈیا نیرٹیو)

وزیر اعظم نریندر مودی نے جمعرات کو سول سروسز ڈے پر 16 افسران کو پبلک ایڈمنسٹریشن میں بہترین کارکردگی کے لیے وزیر اعظم  ایوارڈ دیتے ہوئے کہا کہ ایوارڈ یافتہ  افسران کو سول سروس کے تربیت یافتہ افراد کو ورچوئل میڈیم کے ذریعے  اپنے اچھے کام کے بارے میں بتانا چاہیے۔ انہوں نے کہا کہ اس سے نہ صرف دوسروں کی حوصلہ افزائی ہوگی بلکہ انہیں عملی تجربہ بھی ملے گا۔

وزیر اعظم مودی وگیان بھون میں پبلک ایڈمنسٹریشن میں بہترین کارکردگی کے لیے 16 افسران کو وزیر اعظم ایوارڈ پیش کرنے کے بعد خطاب کر رہے تھے۔ وزیراعظم نے اس موقع پر ترجیحی پروگراموں اور اختراعات پرمبنی ایک ای بک بھی جاری کیا۔وزیر اعظم نے ایوارڈ یافتگان   سے کہا کہ وہ وزارت خارجہ اور محکمہ پولیس سمیت ملک بھر میں واقع سول سروسز سے جڑے تمام تربیت گاہوں میں تربیت حاصل کر رہے امیدواروں کوہر ہفتے ایک سے ڈیڑھ گھنٹے کا وقت نکال کر  ورچوئل میڈیم سے اپنے تجربات کا اشتراک کریں۔

انہوں نے کہا کہ اگر ہر ہفتے دو ایسے ایوارڈ یافتہ افسران سے بات چیت کی جائے تو ان کے تجربات سے افسران کی اگلی نسل کو کافی مدد ملے گی۔ وزیراعظم نے کہا کہ ایسا کرنا افسران کے لیے بھی فائدہ مند ہوگا اور وہ اس سے جڑے رہیں گے۔

واضح رہے کہ پبلک ایڈمنسٹریشن میں ایکسیلنس کے لیے وزیراعظم   ایوارڈ عام شہریوں کی فلاح و بہبود کے لیے اضلاع/عمل درآمد کرنے والی اکائیوں اور مرکزی/ریاستی تنظیموں کی طرف سے کیے گئے غیر معمولی اور اختراعی کاموں کی منظوری کے لیے قائم کیا گیا ہے۔ انہیں شناخت شدہ ترجیحی پروگراموں اور اختراعات کے موثر نفاذ کے لیے بھی نوازا جاتا ہے۔