نئی دہلی، یکم مئی (انڈیا نیرٹیو)

وزیر اعظم نریندر مودی  2 سے 4 مئی کو جرمنی، ڈنمارک اور فرانس کے سرکاری دورے پر ہوں گے۔ وزیراعظم کا رواں سال کا یہ پہلا غیر ملکی دورہ ہوگا۔

خارجہ سکریٹری ونے موہن کواترا نے اتوار کو ایک خصوصی پریس کانفرنس میں بتایا کہ وزیر اعظم اپنے جرمنی، فرانس اور ڈنمارک کے دورے کے دوران یوکرین کے بارے میں ہندوستان کے نقطہ نظر سے آگاہ کریں گے۔

برلن میں وزیراعظم جرمن چانسلر اولاف شولز سے دو طرفہ بات چیت کریں گے۔ دونوں رہنما بھارت-جرمنی بین الحکومتی مشاورت (آئی جی سی) کے 6ویں ایڈیشن کی مشترکہ صدارت بھی کریں گے۔ اس دوران وزیراعظم اورجرمن چانسلر مشترکہ طور پر ایک تاجروں کی تقریب سے خطاب کریں گے۔

وزیر اعظم اپنے جرمنی کے دورے کے بعد ڈنمارک میں منعقد ہونے والی دوسری انڈیا-نارڈک چوٹی کانفرنس میں شرکت کریں گے۔ دوسری ہندوستان-نارڈک چوٹی کانفرنس کے دوران، وزیر اعظم دوسرے نارڈک ممالک کے رہنماؤں، آئس لینڈ کے وزیر اعظم کیٹرن جیکوبسڈوٹیر، ناروے کے وزیر اعظم جوناس گہر اسٹور، سویڈن کے وزیر اعظم میگڈلینا اینڈرسن اور فن لینڈ کی وزیر اعظم سانا مارین کے ساتھ بات چیت کریں گے۔

یہ وزیر اعظم مودی کا ڈنمارک کا پہلا دورہ ہوگا لیکن ڈنمارک کے وزیر اعظم کے ساتھ ان کی چوٹی سطح کی تیسری بات چیت ہوگی۔ بات چیت میں دو طرفہ امور اور عالمی اور علاقائی دلچسپی کے امور پر تبادلہ خیال کیا جائے گا۔

واپسی پر وزیراعظم 4 مئی کو پیرس میں مختصر قیام کریں گے اور صدر ایمانوئل میکرون سے ملاقات کریں گے۔ ہندوستان اور فرانس اس سال اپنے سفارتی تعلقات کے 75 سال کا جشن منا رہے ہیں اور دونوں رہنماؤں کے درمیان ہونے والی ملاقات میں اسٹریٹجک شراکت داری کا ایجنڈا طے کیا جائے گا۔ کواترا نے کہا کہ وزیر اعظم جرمنی اور ڈنمارک دونوں میں ہندوستانی برادری سے خطاب کریں گے۔

دریں اثنا، اپنے دورہ سے پہلے کے بیان میں، وزیر اعظم نے کہا کہ ان کا دورہ یورپ ایک ایسے وقت میں ہو رہا ہے جب خطے کو بہت سے چیلنجوں کا سامنا ہے۔ اپنی متنوع شراکت داریوں کے ذریعے وہ اپنے یورپی شراکت داروں کے ساتھ تعاون کے جذبے کو مضبوط کرنے کا ارادہ رکھتے ہیں۔ یہ ممالک ہندوستان کی امن اور خوشحالی میں اہم شراکت دار ہیں۔

سیکرٹری خارجہ کے مطابق وزیر اعظم کے ہمراہ وزیر خارجہ ایس جے شنکر، وزیر خزانہ نرملا سیتا رمن اور سائنس اور ٹیکنالوجی کے وزیر مملکت جتیندر سنگھ بھی ہوں گے۔