اٹاری سرحد  کے راستے دو ڈرون داخل ہوئے، ایک کو بی ایس ایف نے مار گرایا، ایک واپس گیا

چنڈی گڑھ، 09 مئی (انڈیا نیرٹیو)

پاکستان نے ایک بار پھر ڈرون کے ذریعے بھارت میں دراندازی  کر ہیروئن گرائی ہے۔ بی ایس ایف نے ایک ڈرون کو مار گرایا۔ دوسرا ڈرون پاکستان کی جانب واپس چلاگیا۔ برآمد شدہ ہیروئن کی مالیت تقریباً 74 کروڑ روپے بتائی جاتی ہے۔

بی ایس ایف کے اہلکار اتوار کی رات اٹاری سرحد پر گشت کر رہے تھے۔ رات دو بجے کے قریب پاکستان کی طرف سے ایک ڈرون دووکے پوسٹ سے بھارتی سرحد میں داخل ہوا۔ یہ دیکھتے ہی بی ایس ایف نے فائرنگ شروع کر دی۔ اس ڈرون پر ایک سیاہ رنگ کا بیگ لٹکا ہوا تھا۔ جب بی ایس ایف کے اہلکار اس ڈرون پر فائرنگ کر رہے تھے تو پاکستان نے جوانوں کی توجہ ہٹانے کے لیے ایک اور ڈرون بھیرووال پوسٹ کے ذریعے بھارتی سرحد پر بھیج دیا۔

ڈرون کو تباہ کرنے کے لیے تقریباً آدھے گھنٹے تک فائرنگ کی گئی۔ جس ڈرون میں بیگ لٹکا ہوا تھا، اسے بی ایس ایف نے تباہ کر دیا اور وہ ہندوستان کے حصے میں گرا۔ بی ایس ایف نے تحقیقات کی تو پتہ چلا کہ تباہ شدہ ڈرون چین میں بنایا گیا تھا۔ موقع پر پہنچنے والے بی ایس ایف کے اعلیٰ افسران کی موجودگی میں ڈرون سے گرائے گئے کالے رنگ کے تھیلے کو کھولا گیا اور اس میں سے ہیروئن کے نو پیکٹ برآمد ہوئے۔ ان کی قیمت تقریباً 74 کروڑ ہے۔ اس کے بعد بی ایس ایف نے سرحدی گاوں میں تلاشی مہم شروع کر دی ہے۔ پنجاب پولیس کی مدد سے معلوم کیا جا رہا ہے کہ یہ ہیروئن پاکستان نے کسی شخص کے لیے یہاں بھیجی تھی۔