نو جوانوں کے امور اور کھیلوں کے مرکزی وزیر جناب انورراگ ٹھاکر کل سے کیوڑیہ میں شروع ہونے والی دو روزہ قومی کانفرنس میں ریاستوں اور مرکز کے زیر انتظام علاقوں کے نو جوانوں کے امور اور کھیلوں کے وزیروں اور سکریٹریوں کے ساتھ بات چیت کریں گے ۔ جناب انوراگ ٹھاکر کل صبح افتتاحی تقریب میں کلیدی خطبہ دیں گے ۔
کانفرنس سے پہلے جناب ٹھاکر نے کہا کہ کیوڑیہ میں ’ مجسمہ اتحاد ‘ نہ صرف بھارت میں بلکہ پوری دنیا کی توجہ کا مرکز بنا ہوا ہے ۔ یہ کثرت میں وحدت کی علامت ہے اور کیوڑیہ میں کانفرنس میں مختلف ریاستوں کے وزراء یکجا ہوں گے اور اس بات پر تبادلۂ خیال کریں گے کہ وہ کھیلوں کے لئے کس طرح درست اقدام اٹھا سکتے ہیں تاکہ کھلاڑی بہتر کار کردگی کا مظاہرہ کر سکیں اور ملک کے فخر میں اضافہ کر سکیں ۔ انہوں نے مزید کہا کہ وزیر اعظم جناب نریندر مودی آگے بڑھ کر قیادت کر رہے ہیں اور کھلاڑیوں کو مکمل حمایت دے رہے ہیں ، جس سے کھلاڑیوں کا حوصلہ بڑھا ہے ۔
کانفرنس کے دوران کھیلو انڈیا اسکیم کے مختلف پہلوؤں جیسے ریاستوں میں کھیل کے میدانوں ، تربیتی مراکز / اکیڈمیوں کی جیو – ٹیگنگ ، کھیل مقابلوں کے ذریعہ با صلاحیت کھلاڑیوں کی نشاندہی اور ترقی ، خواتین ، معذوری سے متاثرہ افراد ، قبائلیوں اور دیہی علاقوں کے لئے کھیلوں کا فروغ ، دیسی کھیل اور تعلیم کی اہمیت ، اینٹی ڈوپنگ کے بارے میں جانکاری ، کھیلوں کے لئے ماحول کی تشکیل ، پیشہ ور افراد کا تعاون اور دیگر امور پر تبادلۂ خیال کیا جائے گا ۔ ملک میں کھیلوں کی ترقی ، خاص طور پر حالیہ برسوں میں کھیلوں کی ترقی کا ایک جائزہ بھی پیش کیا جائے گا ۔ نو جوانوں کے امور کے محکمے کے عوام تک رسائی کے پروگراموں ، اسکیموں کا جائزہ اور مستقبل کے لئے نقشۂ راہ وغیرہ پر دوسرے دن تبادلۂ خیال کیا جائے گا ۔
