وزیراعظم نریندر مودی نے ہفتہ کے روز چترکوٹ اور اٹاوہ میں 296 کلومیٹر طویل بندیل کھنڈ ایکسپریس وے کا افتتاح کیا۔ اس موقع پر منعقدہ تقریب سے خطاب کرتے ہوئے وزیراعظم نے کہا کہ ناقص امن و امان اور رابطہ اتر پردیش کے دو بڑے مسائل ہیں۔ اگر ان کو درست کر لیا جائے تو ریاست چیلنجز کا مقابلہ کرنے کی صلاحیت رکھتی ہے۔ انہوں نے کہا کہ اتر پردیش میں یوگی کی حکومت میں امن و امان میں بھی بہتری آئی ہے اور سڑکوں میں بھی تیزی سے بہتری آرہی ہے۔ وزیراعظم نے کہا کہ ہم نہ صرف ملک کے حال کے لیے نئی سہولتیں پیدا کر رہے ہیں بلکہ ملک کا مستقبل بھی تعمیر کر رہے ہیں۔ یہ ایکسپریس وے ترقی کا ایکسپریس وے ثابت ہوگا۔
جالون ضلع کے کیتھری گاؤں میں منعقدہ ایک پروگرام میں وزیراعظم نے کہا کہ ایکسپریس وے نہ صرف یہاں گاڑیوں کو رفتار دے گا بلکہ یہ پورے بندیل کھنڈ کی صنعتی ترقی کو تیز کرے گا۔ ایک وقت تھا جب یہ مانا جاتا تھا کہ آمدورفت پر پہلا حق صرف بڑے شہروں کا ہے، لیکن اب حکومت بھی بدل گئی ہے، مزاج بھی بدل گیا ہے۔ پرانی سوچ کو پیچھے چھوڑ کر ہم نئے انداز میں آگے بڑھ رہے ہیں۔ انہوں نے کہا کہ اتر پردیش اب نئی قراردادوں کے ساتھ تیز رفتاری سے چلنے کے لئے تیار ہے۔ کوئی پیچھے نہ رہے، سب مل کر کام کریں، ڈبل انجن والی حکومت اس سمت میں مسلسل کام کر رہی ہے۔ ریاست کے چھوٹے اضلاع کو فضائی سروس سے جوڑنے کے لیے تیزی سے کام کیا جا رہا ہے۔
مودی نے کہا کہ پہلے کی حکومت کے دوران یوپی میں ہر سال اوسطاً 50 کلومیٹر ریلوے لائنیں بچھتی تھیں، آج اوسطاً 200 کلومیٹر ریلوے لائن بچھائی جا رہی ہے۔ 2014 سے پہلے یوپی میں صرف 11,000 کامن سروس سینٹر تھے، آج 1.30 لاکھ سے زیادہ کامن سروس سینٹر کام کر رہے ہیں۔ آج ملک جس ترقی کے دھارے پر چل رہا ہے اس کے دو پہلو ہیں ایک ارادہ اور دوسرا وقار۔ ہم نہ صرف ملک کے حال کے لیے نئی سہولتیں پیدا کر رہے ہیں بلکہ ملک کے مستقبل کی تعمیر بھی کر رہے ہیں۔
وزیراعظم نے کہا کہ دہلی-میرٹھ ایکسپریس وے کا سنگ بنیاد اور افتتاح دونوں ہماری حکومت میں ہوئے۔ بندیل کھنڈ ایکسپریس وے بھی اس کی ایک مثال ہے۔ اس کام کو اگلے سال فروری میں مکمل ہونا تھا لیکن یہ 7 سے 8 ماہ قبل تیار ہو گیا ہے۔ اس کی بے شمار مثالیں ہیں کہ ہم کس طرح یوپی میں وقت کی حدود کی پابندی کرتے ہیں۔ ہماری اپنی حکومت نے کاشی میں وشوناتھ دھام کا کام شروع کیا اور ہماری حکومت نے اسے مکمل کیا۔
ملک کی آزادی کے امرت مہوتسو کا تذکرہ کرتے ہوئے وزیراعظم نے کہا کہ ”میں آپ سب کو یاد دلانا چاہتا ہوں کہ آزادی کا امرت مہوتسو پورے مہینے ہندوستان کے ہر گھر گھر اور ہر گاؤں میں شایان شان طریقے سے منایا جائے“۔
