اپوزیشن جماعتوں نے اتوار کو مشترکہ طور پر سابق مرکزی وزیر اور گوا کی سابق گورنر مارگریٹ الوا کو نائب صدر کے لیے اپوزیشن کا امیدوار نامزد کیا۔

اتوار کو نیشنلسٹ کانگریس پارٹی کے لیڈر شرد پوار کی رہائش گاہ پر اپوزیشن جماعتوں کے لیڈروں کی میٹنگ ہوئی۔ اس ملاقات کے بعد اپوزیشن رہنماؤں نے پریس کانفرنس کر کے اپنے امیدوار کا اعلان کیا۔

شرد پوار نے پریس کانفرنس میں بتایا کہ غیر بی جے پی سیاسی جماعتوں نے متفقہ طور پر نائب صدر کے عہدے کے لیے مارگریٹ الوا کے نام کا فیصلہ کیا ہے۔ 17 سیاسی جماعتوں نے براہ راست الوا کی حمایت کی ہے۔ اس میں کانگریس، سماج وادی پارٹی، نیشنلسٹ کانگریس پارٹی، آر جے ڈی، شیوسینا، ٹی آر ایس، آر ایس پی اور بائیں بازو کی جماعتیں نمایاں ہیں۔

پوار نے کہا کہ ترنمول کانگریس لیڈر ممتا بنرجی سے بھی حمایت کے لیے رابطہ کیا گیا تھا لیکن ان سے رابطہ نہیں ہو سکا۔ اس کے ساتھ ہی دہلی کے وزیر اعلی اروند کیجریوال سے بھی رابطہ کیا گیا ہے اور توقع ہے کہ جلد ہی ان کی عام آدمی پارٹی اپوزیشن لیڈر کی حمایت کا اعلان کرے گی۔پوار نے کہا کہ مارگریٹ الوا اپوزیشن کے امیدوار کے طور پر منگل 19 جولائی کو اپنا پرچہ نامزدگی داخل کریں گی۔

مارگریٹ الوا گوا، گجرات، راجستھان اور اتراکھنڈ کی گورنر رہ چکی ہیں۔ وہ ماضی میں کابینہ کی وزیر بھی رہ چکی ہیں۔ وہ آل انڈیا کانگریس کمیٹی کی جوائنٹ سکریٹری رہ چکی ہیں۔ ان کی ساس وائلٹ الوا 1960 کی دہائی میں راجیہ سبھا کی ڈپٹی اسپیکر تھیں۔