ڈھاکہ ،18؍اگست

بنگلہ دیش کی وزیر اعظم شیخ حسینہ نے ہندوستان کے ساتھ ایک جامع اقتصادی شراکت داری کے معاہدے (سی ای پی اے) پر دستخط کرنے کے لیے باضابطہ بات چیت شروع کرنے کے لیے گرین سگنل دے دیا ہے جس سے مشرقی اور شمال مشرقی ہندوستان میں تجارت اور سرمایہ کاری کو بڑے پیمانے پر فروغ مل سکتا ہے۔ یہ کسی بھی ملک کے ساتھ ڈھاکہ کا پہلا تجارتی معاہدہ ہوگا، اور اس نے چین اور جاپان کی جانب سے آزاد تجارتی معاہدے کرنے کی درخواستوں کے باوجود بھارت کو ترجیح دی ہے۔  جاپان اور چین کے ساتھ معاہدات ابھی تک تشخیصی مرحلے میں ہیں۔ جامع اقتصاد ی شراکت داری معاہدہ  6-7 ستمبر کو شیخ حسینہ کے یہاں مجوزہ دورے کے دوران ایجنڈے میں سرفہرست ہوگا۔

ڈھاکہ۔دہلی کے مشترکہ فزیبلٹی اسٹڈی سے انکشاف ہوا ہے کہ  مجوزہ معاہدے سے بنگلہ دیش کی برآمدی آمدنی میں 190% اور ہندوستان کی 188% اور مجموعی گھریلو پیداوار میں بالترتیب 1.72% اور 0.03% اضافہ متوقع ہے۔ معاہدہ سامان اور خدمات، سرمایہ کاری، املاک دانش کے حقوق اور ای کامرس میں تجارت کا احاطہ کرے گا۔ گزشتہ مالی سال میں، بنگلہ دیش کی بھارت کو برآمدات پہلی بار تقریباً 2 بلین ڈالر تک پہنچ گئیں۔  ہندوستان سے کل 14 بلین ڈالر کی درآمدات ہوئیں۔ ڈھاکہ کے عہدیداروں نے کہا کہ بنگلہ دیش نے پہلے ہی جنوبی ایشیائی آزاد تجارتی علاقے کے معاہدے کے تحت ایک کم ترقی یافتہ ملک کے طور پر بھارت کو تمباکو اور الکحل سمیت 25 مصنوعات کے علاوہ تمام مصنوعات کی برآمدات کے لیے ڈیوٹی فری اور کوٹہ فری فوائد حاصل کیے ہیں۔

مارچ 2021 میں وزیر اعظم نریندر مودی کے بنگلہ دیش کے دورے کے دوران، انہوں نے اور حسینہ نے سی ای پی اے پر دستخط سے متعلق مشترکہ فزیبلٹی اسٹڈی کو مکمل کرنے کی ہدایات جاری کیں۔ اسی کے مطابق، بنگلہ دیش کے فارن ٹریڈ انسٹی ٹیوٹ اور انڈیا کے سینٹر فار ریجنل ٹریڈ نے تفصیلی مشترکہ فزیبلٹی اسٹڈی کی۔  اس سال مئی میں، انہوں نے مطالعاتی رپورٹ اپنی متعلقہ وزارت تجارت کو بھیجی۔  رپورٹ میں سی ای پی اے پر دستخط کے لیے مذاکرات شروع کرنے کی تجویز دی گئی۔ مشترکہ فزیبلٹی اسٹڈی کی حتمی مسودہ رپورٹ کے مطابق، تجارتی معاہدے پر دستخط ہونے کے بعد، بنگلہ دیش کی برآمدی آمدنی اگلے 7-10 سالوں میں5-3بلین  امریکی ڈالراور ہندوستان کی 4-10 بلین تک بڑھ جائے گی۔