پٹنہ، 28  اگست(انڈیا نیرٹیو)

اردو بہار میں دوسری سرکاری زبان کا درجہ رکھتی ہے۔ اس کے فروغ کے لئے حکومتی سطح پر وقتا ًفوقتا ًمہم اور پروگرام بھی ہوتے ہیں۔اردو ڈائریکٹوریٹ محکمہ کابینہ سکریٹریٹ کے تحت غیراردو داں طبقے کے درمیان اردو پڑھنے لکھنے کے لئے آن لائن کلاسزہوتی ہیں،تاکہ لوگوں کو ریاست کی دوسری سرکاری زبان اردو کا پڑھنا اور لکھنا سکھایا جا سکے۔

اردو آن لائن کلاس سرکاری محکموں کے افسران وملازمین کرسکتے ہیں۔ اردو ڈائرکٹوریٹ کابینہ سکریٹریٹ کی اس پہل کے مثبت نتائج بھی سامنے آئے ہیں۔ اب گیا ضلع ایجوکیشن افسر راج دیو رام نے ضلع کے سبھی بلاک ایجوکیشن افسر، اسکول سب انسپکٹر، سبھی طرح کے اسکولوں کے ہیڈماسٹرز کو لیٹر بھیجا ہے جس میں خواہش مند افراد کو اردو پڑھنے کے لیے ا?ن لائن کلاس کرنے کی اجازت دے دی ہے۔

اس حوالے سے ایجوکیشن افسر راج دیو رام نے بتایا کہ اردو تربیتی سیشن یکم ستمبر سے شروع ہوگا اور اس سلسلے میں انہوں نے تمام ڈی پی او، بی ای او، اسکولوں کے ہیڈ ماسٹر اور ڈی ای او آفس میں کام کرنے والے اہلکاروں کو ہدایات جاری کی ہیں۔ ڈی ای او نیاس سلسلے میں کہاہے کہ غیر اردو بولنے والے افسران اور ملازمین جو تربیت حاصل کرنے کے خواہشمند ہیں۔ وہ اپنے کنٹرولنگ افسر کے ذریعے ڈائریکٹر اردو ڈائریکٹوریٹ کابینہ سکریٹریٹ کمرہ نمبر 2092 سی بلاک  افسر ہاسٹل بیلی روڈ پٹنہ کو رجسٹرڈ ڈاک یا ڈائریکٹر اردو کوای۔ میل کے ذریعے اپنی درخواست بھیج دیں۔

ضلع  ایجوکیشن افسر راج دیو رام کے مطابق یکم ستمبر سے آن لائن کلاس پیر، منگل، بدھ اور جمعرات کو دوپہر 1 بجے سے 3 بجے تک 60 دنوں تک روزانہ دو گھنٹے تک چلے گی۔ سیشن کے اختتام کے بعد ا?ن لائن ٹیسٹ لیا جائے گا۔ کامیاب افراد کو سرٹیفکیٹ بھی دیئے جائیں گے۔