جموں، 26 ستمبر (انڈیا نیرٹیو)

جموں و کشمیر کے سابق وزیر اعلیٰ و مرکزی وزیر  غلام نبی آزاد نے آج یہاں اپنی نئی پارٹی ڈیموکریٹک آزاد پارٹی کے نام کا اعلان کرتے ہوئے کہا کہ سیاست میں کوئی دشمن نہیں ہوتا۔ ہم سیاسی جماعتوں کی پالیسیوں کی مخالفت کر سکتے ہیں۔ انہوں نے کہا کہ ڈیموکریٹک آزاد پارٹی میں لفظ آزاد کا مطلب ان کا نام نہیں بلکہ آزاد ہے۔ یعنی ان کی پارٹی ایک مکمل طور پر آزاد جمہوری پارٹی ہوگی، جس کا تعلق جموں و کشمیر کے لوگوں سے ہوگا۔

پارٹی کے نام کا اعلان کرنے کے بعد آزاد نے صحافیوں کے سامنے پارٹی پرچم بھی لہرایا۔پارٹی کا اعلان کرنے سے قبل آزاد نے پورے ہندوستان بالخصوص جموں و کشمیر کے لوگوں کو نوراتری کی مبارکباد دی۔اتوار کے روز جموں ہوائی اڈے سے آزاد سیدھے گاندھی نگر میں اپنی رہائش گاہ پہنچے۔ اپنی رہائش گاہ کے باہر صحافیوں سے مختصر بات چیت میں آزاد نے کہا کہ میں یہاں لیڈروں اور کارکنوں سے ملنے آیا ہوں۔

پریس کانفرنس سے خطاب کرتے ہوئے آزاد نے کہا کہ اْنہوں نے کسی جماعت یا سیاسی لیڈر سے متاثر ہو کر پارٹی نہیں بنائی ہے۔بلکہ ایک الگ نظریہ سوچ کے ساتھ پارٹی کو وجود میں لایا ہے۔پارٹی کی بنیاد ہی سچ پر مبنی ہے۔وہ کوئی ایسا وعدہ کرکے پارٹی نہیں بنا رہے ہیں جو بعد میں وفا نہ ہو۔اْنہوں نے کہا کہ وہ جموں و کشمیر کی تعمیر و ترقی کے لئے ہر محاذ ہر لڑائی لڑنے کو تیار ہیں۔