نئی دہلی، 20 دسمبر (انڈیا نیرٹیو)

راجدھانی دہلی میں آلودگی کے ساتھ گھنے کوہرے نے لوگوں کی مصیبتوں میں اضافہ کر دیا ہے۔ منگل کو دارالحکومت گھنے کوہرے کی چادر میں لپٹا ہوا نظرآیا۔ محکمہ موسمیات نے دہلی، اترپردیش، ہریانہ میں اگلے پانچ دنوں تک کوہرے اور درجہ حرارت میں کمی کا الرٹ جاری کیا ہے۔منگل کو دارالحکومت میں کم سے کم درجہ حرارت 7 ڈگری ریکارڈ کیا گیا جب کہ زیادہ سے زیادہ درجہ حرارت 22 ڈگری رہنے کا امکان ہے۔ وہیں، ایئر کوالٹی انڈیکس (اے کیو آئی) کی اوسط سطح 414 ریکارڈ کی گئی، جو شدید زمرے میں آتی ہے۔

دارالحکومت این سی آر میں منگل کو حد بصارت 100 میٹر سے کم ریکارڈ کی گئی۔ محکمہ موسمیات کی جانب سے جاری کردہ رپورٹ کے مطابق پالم میں صبح کے وقت حد بصارت 25 میٹر تھی جب کہ صفدرجنگ میں حد نگاہ 50 میٹر تھی۔ ہائی وے پر حد بصارت بہت کم تھی۔ محکمہ موسمیات کے مطابق منگل کو انڈمان اور نکوبار جزائر میں کئی مقامات پر بارش کا امکان ہے۔ اس کے علاوہ کیرالہ، تمل ناڈو، ا?ندھرا پردیش، کرناٹک، اڈیشہ اور مہاراشٹر میں گرج چمک کے ساتھ بارش کا امکان ہے۔ ملک کے باقی حصوں میں موسم معمول پر رہے گا۔ اس کے ساتھ ہی، اگلے پانچ دنوں تک شمالی ہندوستان میں گھنے کوہرے چھائے رہنے کا امکان ہے۔