فیفا فٹبال ورلڈ کپ 2022 کی فاتح ارجنٹینا کی ٹیم کا اپنے ملک واپسی پر شاندار استقبال ہواہے۔ ٹیم کی ایک جھلک دیکھنے کے لیے شائقین سڑکوں پر نکل آئے اور ٹیم کی جیت کا جشن مناتے رہے۔

واضح ہو کہ ارجنٹینا نے 18 دسمبر کو قطر کے شہر لوسیل میں کھیلے گئے فائنل میں فرانس کو پنالٹی شوٹ آؤٹ میں شکست دی اور 36 سال بعد ورلڈ کپ جیتا۔ ارجنٹینا کی حکومت نے لیونل میسی کی قیادت میں واپس آنے والی ٹیم کا شاندار استقبال کرنے کے لیے منگل کو پہلے ہی ملک میں سرکاری تعطیل کا اعلان کیا تھا۔

ارجنٹینا کے وقت کے مطابق منگل کی صبح 3.30 بجے ارجنٹینا کی ٹیم ایئربس اے 330-220 کے ذریعے ملک کے دارالحکومت بیونس آئرس کے ہوائی اڈے پر پہنچی۔ میسی ٹرافی لے کر پہلے اترے۔ وہاں موجود سبھی نے تالیوں کے ساتھ ٹیم کا استقبال کیا۔

ہوائی اڈے کے باہر ہزاروں شائقین موجود تھے اور ہجوم کو سنبھالنے کے لیے سیکورٹی فورسز کو خصوصی طور پر تعینات کیا گیا تھا۔ میسی سمیت تمام کھلاڑی کھلی بس کی چھت پر بیٹھ کر ایئرپورٹ سے باہر آئے اور پورا شہر اپنے ملک کے جھنڈوں کے ساتھ سڑک پر کھڑے ہو کر  اپنی ٹیم اور اس کے ہیروز کا استقبال کرنے لگا۔

قابل ذکر ہے کہ ارجنٹینا نے 1978 اور 1986 میں بھی ورلڈ کپ جیتا تھا۔ اس بار ٹیم کو پہلے ہی خطاب  کی مضبوط دعویدار تصور کیا جا رہا تھا لیکن سعودی عرب نے گروپ مرحلے کے پہلے ہی میچ میں ٹیم کو شکست دے کر سب کو حیران کر دیا۔