جام نگر (گجرات)، 2 اپریل(انڈیا نیرٹیو)

بھارتی کرکٹ ٹیم کے سابق قدآور کھلاڑی سلیم درانی طویل علالت کے بعد 88 برس کی عمر میں انتقال کر گئے۔ انہوں نے آج (اتوار) صبح یہاں آخری سانس لی۔ انہیں کینسر تھا۔سلیم درانی 11 دسمبر 1934 کو افغانستان کے کابل میں پیدا ہوئے تھے۔ آٹھ ماہ کے درانی کو لیکر ان کا خاندان پاکستان کے کراچی میں آباد ہو گیا تھا۔ درانی کا خاندان ہندوستان اور پاکستان کی تقسیم کے دوران ہندوستان چلا آیا۔

سلیم درانی نے 70-60 کی دہائی میں اپنی آل راؤنڈ کارکردگی سے کرکٹ کی دنیا میں ایک خاص پہچان بنائی۔ درانی کو ہندوستانی کرکٹ کی تاریخ میں ایک عظیم آل راؤنڈر کے طور پر جانا جاتا ہے۔ انہوں نے اپنے کیریئر کا آغاز 1960 میں آسٹریلیا کے خلاف ممبئی ٹیسٹ سے کیا۔ درانی اپنی دھماکہ خیز بلے بازی کے لیے جانے جاتے تھے۔

درانی نے بھارت کے لیے کل 29 ٹیسٹ میچ کھیلے۔ اس دوران انہوں نے 1202 رن بنائے۔ ان میں ایک سنچری اور سات نصف سنچریاں شامل ہیں۔ اس کے علاوہ انہوں نے 75 وکٹیں حاصل کیں۔ سلیم درانی پہلے ہندوستانی کرکٹر ہیں جنہیں ساٹھ کی دہائی میں ہی ارجن ایوارڈ سے نوازا گیا تھا۔