قبائلی امور کے سکریٹری ڈاکٹر شاہد اقبال چودھری نے آج ’’عصری دنیا میں گوجری زبان‘‘ کے موضوع پر دو روزہ کانفرنس کا افتتاح کیا۔دو روزہ کانفرنس کا اہتمام جموں و کشمیر اکیڈمی آف آرٹ، کلچر اینڈ لینگوئجز (JKAACL) نے کیا ہے اور گوجری زبان اور ثقافت کے مستقبل پر غور و فکر کرنے والے اسکالرز اور ماہرین کی کہکشاں کو اکٹھا کیا ہے۔

اپنے خطاب میں ڈاکٹر شاہد نے گوجری زبان اور ثقافت کو درپیش چیلنجز سے نمٹنے کے لیے اجتماعی کوششوں پر زور دیا۔ انہوں نے علاقائی زبانوں اور ثقافت کی ہمہ گیر ترقی کے لیے اٹھائے گئے اقدامات کو سراہا۔افتتاحی نشست کے بعد معروف ادیب اور براڈ کاسٹر گلاب دین طاہر نے گوجری زبان پر مقالہ پیش کیا۔ اپنے مقالے میں جی ڈی طاہر نے کہا کہ گوجری زبان کا صدیوں پرانا ماضی ہے جس میں ادب اور شاعری کا بیش بہا خزانہ ہے اور یہ شمالی ہندوستان کی امیر زبانوں میں سے ایک ہے۔

قبل ازیں، اپنے استقبالیہ خطاب میں، سکریٹری  جے کے اے اے سی ایل، بھرت سنگھ نے کہا کہ کانفرنس کا مقصد گوجری زبان کو درپیش چیلنجوں اور اس کے راستے میں آنے والے مواقع کے پس منظر میں ایک جامع نظریہ پیش کرنا ہے۔ انہوں نے مزید کہا کہ “اپنی زبانوں کو جدید دور سے ہم آہنگ کرنا بہت ضروری ہے تاکہ ان کی بقا اور فروغ کو یقینی بنایا جا سکے۔”2 روزہ پروگرام کے ایک حصے کے طور پر، موسیقی کے پروگرام اور پیپر ریڈنگ سیشن بھی منعقد کیے گئے۔

کانفرنس کی کارروائی ایڈیٹر و سربراہ گوجری ونگ ڈاکٹر شاہنواز نے چلائی۔کانفرنس میں عبدالغنی عارف کے علاوہ سلام الدین بجاد، ایم کے وقار، عبدالحمید کسانہ، غلام حیدر بڈانہ، جاوید نظامی، منشا خاکی نے شرکت کی۔