پاسپورٹ حاصل کرنے کے لیے محبوبہ مفتی کا ہائی کورٹ سے رجوع

کہا پولیس کی تصدیقی رپورٹ پاسپورٹ آفس کو ارسال نہیں کی گئی

سابق وزیراعلیٰ اور پی ڈی پی صدر محبوبہ مفتی نے پاسپورٹ حاصل کرنے کے لیےہائی کورٹ سے رجوع کیا ہے۔ محبوبہ مفتی کو پاسپورٹ میں مبینہ طور پر پولیس کی تصدیقی رپورٹ نہ ملنے کی وجہ سے پاسپورٹ میں رکاوٹ حائل ہورہی تھی جس کے بعد انہوں نے جموں و کشمیر ہائی کورٹ سے اس سلسلے میں رجوع کیا ہے۔نمائندے کے مطابق سابق وزیر اعلیٰ محبوبہ مفتی نے عدالت کے سامنے اپنی درخواست میں کہا کہ ان کے پاسپورٹ کی میعاد31 مئی2019 تک تھی۔

 انہوں نے کہا ہے کہ انہوں نے گزشتہ سال 11 دسمبر کو علاقائی پاسپورٹ آفیسر کے سامنے پاسپورٹ کے اجراء کیلئے درخواست دی تھی۔محبوبہ مفتی نے کہا ہے کہ ریکارڈس سے ظاہر ہوتا ہے کہ میعاد گزرنے کے باوجود پولیس کی تصدیقی رپورٹ ایڈیشنل ڈائریکٹر جنرل آف پولیس سی آئی ڈی کے آفس سے نامعلوم وجوہات کی بناء پر پاسپورٹ آفس کو ارسال نہیں کی گئی ہے، جو مرکزی وزارت خارجہ کے جاری کردہ رہنما خطوط کے برعکس ہے۔

ان کا کہنا ہے کہ قوانین کے مطابق پاسپورٹ تقریباً 30 دنوں کے اندر بھیج دیا جانا چاہئے۔ ایک مہینے سے زیادہ عرصہ گزرنے کے بعد یہ دیکھتے ہوئے کہ پاسپورٹ نہیں روانہ کیا گیا ہے اور پاسپورٹ پولیس کی تصدیقی رپورٹ کے سلسلے میں ابھی زیر التوا ہے۔ انہوں نے اس بارے میں پاسپورٹ آفیسر سے رجوع کر کے ان کو مطلع کیا کہ ایک مہینے سے زیادہ عرصہ گزرنے کے باوجود ان کی طرف سے طلب کردہ رپورٹ انہیں پیش نہیں کی گئی ہے جب کہ مرکزی وزارت خارجہ کے سیکریٹری کی طرف سے جاری کردہ رہنما خطوط کے مطابق پولیس کی جانب سے تصدیقی رپورٹ کو21 دن کی مدت میں مکمل کرنا ضروری ہے۔

محبوبہ مفتی نے اب ہائی کورٹ سے اس بارے میں رجوع کیا ہے اور کورٹ سے اس سلسلے میں ہدایات جاری کرنے کا مطالبہ کیا ہے جس میں انہوں نے انہیں پاسپورٹ اجرا کرنے اور انہیں بیرون ممالک سفر کرنے کی اجازت کے حوالے سے ہدایات طلب کئے ہیں۔