ایم ایل کے ساتھ زیادتی کرنے والے پولس اہلکار کی غنڈہ گردی برداشت نہیں کی جائے گی 

پٹنہ ،26مارچ (انڈیا نیرٹیو)

بہار اسمبلی کے اسپیکروجئے کمار سنہا نے ایڈیشنل چیف سکریٹری محکمہ داخلہ چیتنیا پرساد اور بہار کے ڈی جی پی ایس کے سنگل سے بات چیت کی ہے۔ اسپیکر نے اراکین اسمبلی کو لات گھونسے سے مارنے والے پولیس اہلکاروں کے خلاف سخت کاروائی کرنے کی ہدایت دی ہے، اسپیکر وجئے کمار سنہا نے دیر شام بہار کے ڈی جی پی ایس کے سنگل سے بات کی اور کہا کہ منگل کے روز اسمبلی  احاطے میں ممبران اسمبلی کو بے دردی سے مارنے   پیٹنے اور خواتین ایم ایل اے کے ساتھ بدسلوکی کرنے والے پولیس اہلکار وں کی نشاندہی کرکے ان کے خلاف سخت کارروائی کی جائے ،ان کے خلاف رپورٹ درج کی جانی چاہیے۔

 اسپیکر وجئے سنہا نے واضح الفاظ میں کہا کہ ایوان کے وقار کا خیال رکھنا ایوان کی ذمہ داری ہے۔ کسی کو بھی ایوان کی وقار کے لکشمن ریکھا کو عبور کرنے کی اجازت نہیں ہے۔ اسپیکر نے بدانتظامی کی ویڈیو فوٹیج اسمبلی کمیٹی کے حوالے کرنے کی بھی ہدایت کی ہے۔ کارروائی صرف ویڈیو فوٹیج کی بنیاد پر کی جائے گی۔واضح ہو کہ اس سے قبل مشترکہ طور پر پریس کانفرنس کے ذریعے ان دونوں عہدیداروں نے بہار قانون ساز اسمبلی میں ممبران اسمبلی کی وحشیانہ پٹائی کا الزام اسپیکر پر عائد کیا۔

بہار کے ڈی جی پی اور محکمہ داخلہ کے ایڈیشنل چیف سکریٹری نے دعوی کیا کہ منگل کو اسمبلی میں جو کچھ بھی ہوا وہ اسپیکر کی ہدایت پر ہوا۔ اگر کسی کو لگتا ہے کہ پولیس نے غلط کام کیا ہے تو اسمبلی  اسپیکرکو کارروائی کی ہدایت دینی چاہئے ، مجرموں کے خلاف کارروائی کی جائیگی۔ 

در اصل قانون ساز اسمبلی میں اپوزیشن کے ایم ایل اے کو پولیس  نے بوٹ سے مارا تھا یہ ویڈیو پورے ملک میں وائرل ہواہے۔ گذشتہ روز نتیش کمار نے کہا ہے کہ انہیں پولیس کی کوئی غلطی نظر نہیں آئی، جمعرات کے روز جب نامہ نگاروں نے بہار کے محکمہ داخلہ کے ایڈیشنل چیف سکریٹری چیتنیا پرساد اور ڈی جی پی ایس کے سنگل سے پوچھا کہ کیا انہوں نے ایم ایل اے کو پولیس کے ذریعے بوٹ سے مارنے والی ویڈیو دیکھی ہے؟ دونوں عہدیداروں نے کہا کہ انہوں نے کچھ نہیں دیکھا۔

محکمہ داخلہ کے ایڈیشنل چیف سکریٹری چیتنیا پرساد اور ڈی جی پی ایس کے سنگھل نے بتایا کہ پولیس کو منگل کے روز بہار اسمبلی میں قانون ساز اسمبلی کے اسپیکر نے بلایا تھا۔ پولیس اسپیکر کے کہنے پر گئی پولیس نے ان کی ہدایت پر عمل کیا۔ چیتنیا پرساد نے بتایا کہ پولیس اسپیکر کے کہنے پر مارشل کے تعاون کے لئے گئی تھی۔ ڈی جی پی ایس کے سنگل نے کہا کہ اسپیکر کا اسمبلی احاطے پر مکمل کنٹرول ہے اسپیکر وہاں بھی کسی بھی طرح کی تفتیش کرسکتے ہیں۔ وہاں حکومت یا انتظامیہ کا کوئی اختیار نہیں ہے اگر کسی کو لگتا ہے کہ پولیس نے زیادتی کی ہے تو اسپیکر کو اس کی تحقیقات کرانی چاہیے ۔ اسپیکر ہدایت دیں جو بھی ہدایت ہوگی اس کے مطابق کارروائی کی جائے گی۔