امرناتھ کی مقدس گپھا کے لیے سالانہ یاترا کا رجسٹریشن آج سے

جنوبی کشمیر میں امرناتھ کی مقدس گپھا کے لیے سالانہ یاترا کا رجسٹریشن آج شروع ہوگا۔ 3 ہزار 880 میٹر اونچی مقدس گپھا کے لیے 56 دن کی یاترا 28 جون کو پہلگام اور بال تل کے دہرے راستوں سے شروع ہوگی اور 22 اگست کو اختتام کو پہنچے گی۔اس بات کا انکشاف شری امرناتھ جی شرائن بورڈ کےCEO نتیشور کمار نے کیا۔ انہوں نے کہا کہ رجسٹریشن ملک بھر کے پنجاب نیشنل بینک‘ جموں وکشمیر بینک اورYes بینک کی 446 مخصوص بینک شاخوں کے ذریعے کیا جائے گا۔

انہوں نے کہا کہ رجسٹریشن کے لیے طریقہ کار، درخواست فارم اور مکمل پتوں کے ساتھ ریاست کے اعتبار سے بینک شاخوں کی فہرست کے بارے میں تفصیلات بورڈ کی ویب سائٹ پر دستیاب ہیں۔ انہوں نے کہا کہ صرف صحت سرٹیفکٹ، جو کہ ریاستی سرکاروں یا مرکز کے زیر انتظام علاقوں کی انتظامیہ کے ذریعے نامزد کئے گئے ڈاکٹروں یا طبی اداروں کے ذریعے جاری کئے گئے ہیں، رجسٹرڈ بینک برانچوں میں قبول کئے جائیں گے۔CEOنے کہا کہ یہ سرٹیفکٹ لازمی ہیں، کیوں کہ مقدس گپھا کافی زیادہ اونچائی پر ہے اور سفر کافی مشکل ہے۔

 انہوں نے کہا کہ یاترا -2021 صرف اُن صحت سرٹیفکٹ کے لیے ویلڈ ہوگی، جو 15 مارچ کے بعد جاری کی گئی ہے۔ جناب کمار نے کہا کہ 13 سال سے کم عمر یا 75 سال سے زیادہ عمر کے لوگوں اور وہ خواتین‘ جو 6 ہفتے سے زیادہ کی حاملہ ہیں‘ کا کووڈ-19 کے ضابطوں کے مطابق اس سال کی یاترا کیلئے رجسٹریشن نہیں کیا جائے گا۔