ایگزٹ پول: بنگال میں ترنمول ، آسام میں بی جے پی ، کیرالہ میں بائیں بازو کی جماعتوں کی واپسی کے امکان

ملک کی پانچ ریاستوں میں ہونے والے اسمبلی انتخابات کے حوالے سے ایگزٹ پول سے ظاہر ہوتا ہے کہ مغربی بنگال میں ترنمول کانگریس کی رہنما ممتا بنرجی اور آسام میں بھارتیہ جنتا پارٹی کی اقتدار میں واپسی ہوسکتی ہے۔

توقع ہے کہ حکمراں بائیں محاذ بھی کیرالہ میں اقتدار میں برقرار رہے گا ، جب کہ پڑوسی ریاست تمل ناڈو میں سیاسی تبدیلی کے تحت اپوزیشن ڈی ایم کے کی زیرقیادت اتحاد حکمرانی کی باگ ڈور سنبھال سکتا ہے۔

چار سروے ایجنسیوں کے ذریعہ کئے گئے ایگزٹ پول میں اوسط کی بنیاد پر ایک اندازے کے مطابق ممتا بنرجی کی ترنمول کانگریس کو مغربی بنگال کی 292 ممبران اسمبلی میں سے 149 نشستیں مل سکتی ہیں۔ ریاست میں اصل تبدیلی کے نعرے کے ساتھ انتخابی مہم چلانے والی بھارتیہ جنتا پارٹی 116 نشستیں حاصل کرسکتی ہے۔

ہمسایہ ریاست آسام میں ، بی جے پی 126 رکنی اسمبلی میں 75 نشستوں پر کامیابی حاصل کرکے اقتدار میں واپس آئے گی ، جبکہ کانگریس اتحاد کو 50 نشستوں پر ہی اطمینان کرنا پڑے گا۔ اس بار کیرالہ میں ، ہر پانچ سال بعد اقتدار بدلنے کے رجحان کے خلاف ، بائیں بازو کے محاذ کی واپسی متوقع ہے۔ 140 رکنی ریاستی اسمبلی میں بائیں بازوکو 76 نشستیں ملنے کا اندازہ لگایا گیا ہے۔

 تمل ناڈو میں ڈی ایم کے اتحاد کو بڑی کامیابی حاصل ہونے کی توقع ہے۔ ڈی ایم کے اتحاد کو 234 ممبران اسمبلی میں 171 اور اے آئی اے ڈی ایم کے اتحاد کو 58 نشستیں ملنے کا امکان ہے۔

قابل ذکر ہے کہ مغربی بنگال میں ووٹنگ کے آخری مرحلے کے ساتھ ہی چار ریاستوں اور مرکز کے زیر انتظام ایک ریاست میں ووٹنگ کا عمل مکمل ہوگیا ہے۔ اب ان ریاستوں اور کچھ دیگرریاستوں میں اسمبلی اور لوک سبھا نشستوں کے ضمنی انتخابات کے نتائج 2 مئی کو آئیں گے۔