دہلی حکومت نے لاک ڈاون کومزید ایک ہفتے کے لیے بڑھا دیا

نئی دہلی ، 09 (انڈیا نیرٹیو)

قومی دارالحکومت میں لاک ڈاون کے بعد کورونا کے معاملوں میں گراوٹ کے باعث دہلی حکومت نے اتوار کے روز ایک بار پھر لاک ڈاون بڑھانے کا اعلان کیا ہے۔دہلی کے وزیر اعلیٰ اروند کیجریوال نے لاک ڈاون بڑھانے کا اعلان کرتے ہوئے کہا کہ 26اپریل کو 35فیصدسے زیادہ کیس آنا شروع ہوگئے تھے جس کو دیکھتے ہوئے لاک ڈاون لگانے کا فیصلہ کیا گیا۔جس کے بعد کورونا کے معاملوں میں گراوٹ آئی ہے اور کورونا کی چین ٹوٹ رہی ہے۔لیکن ابھی وقت نہیں آیا ہے کہ ڈھیل دی جائے۔جان ہے تو جہان ہے۔اس بار مزید سخت لاک ڈاون لگایا جارہاہے ۔ کل سے میٹرو بھی بند کی جارہی ہے۔

قابل ذکر ہے کہ لاک ڈاون کی وجہ سے ، روزانہ سامنے آنے والے معاملوں میں نمایاں کمی واقع ہوئی ہے اور یہ کم ہوکر 17 ہزار رہ گئی ہے۔ دہلی میں بھی مثبت معاملوں کی شرح میں نمایاں کمی آئی ہے اور وہ 25 فیصد سے بھی کم رہ گئی ہے۔

لاک ڈاون 19 اپریل سے قومی دارالحکومت میں نافذ ہے۔ جس کو وزیر اعلیٰ اروند کیجریوال تین بار بڑھا چکے ہیں۔ دہلی میں 10 مئی کی صبح ختم ہونے والا لاک ڈاون ایک بار پھر بڑھایا گیا ہے۔ جس کے بعد دہلی میں لاک ڈاون اس وقت تک جاری رہے گی جب تک دہلی حکومت کا اگلا حکم نہیں آتا ہے۔

اسی دوران ، ایک سروے کے مطابق ، کورونا وائرس روکنے کے لیے ، دہلی کے 85 فیصد لوگ چاہتے ہیں کہ لاک ڈاون کی مدت کم از کم ایک ہفتہ مزید بڑھا دی جائے۔ جب کہ 47 فیصد نے تین ہفتوں تک لاک ڈاون بڑھانے کے حق میں ووٹ دیا۔ یہ رائے آن لائن فورم لوکل سرکل کے سروے میں سامنے آئی ہے۔ یہ سروے 6 سے 8 مئی کے درمیان کیا گیا تھا اور سروے میں شامل 84 فیصد لوگوںکا کہنا ہے رابطے میں آئے بغیرسبھی سامان کی گھر پر فراہمی کی اجازت دی جائے۔