کورونا وبا کی وجہ سے ہوائی مسافرون میں زبردست کمی

کووڈ۔ 19 وبائی بیماری کی دوسری لہر کے نتیجے میں ہوائی مسافروں کی تعداد میں زبردست کمی واقع ہوئی ہے جس کے بعد وزارت شہری ہوا بازی نے اپنی ویب سائٹ پر روزانہ کے اعداد و شمار جاری کرنا بند کردیئے ہیں۔

ڈائریکٹوریٹ جنرل جنرل سول ایوی ایشن (ڈی جی سی اے) کے ذریعہ منگل کو جاری کردہ اعداد و شمار کے مطابق ، اس سال مارچ کے مقابلہ میں ، اپریل میں گھریلو راستوں پر مسافروں کی تعداد 26.81 فیصد کم ہوکر 57.25 لاکھ رہ گئی۔ یہ تعداد اکتوبر 2020 کے بعد سب سے کم ہے۔ اس سال مارچ میں ، 78.22 لاکھ افراد نے ہوائی سفر کیا۔

مئی میں اس تعداد میں مزید تیزی سے کمی کے بعد ، شہری ہوا بازی کی وزارت نے مسافروں اور پروازوں کے لیے روزانہ کے اعداد و شمار جاری کرنا بند کردیئے ہیں۔ حتمی اعدادوشمار 14 مئی تک کے دستیاب ہیں ، جب ایک ہی دن میں 54،181 مسافر 825 پروازوں میں سوار ہوئے۔ یہ اپریل کے روزانہ اوسط سے 72 فیصد کم ہے۔

عام طور پر اپریل اور مئی میں ہوائی مسافروں کی تعداد میں اضافہ ہوتا ہے کیونکہ اسکولوں کالجوں میں بچوں کی تعطیلات کے باعث بچے کنبے کے ساتھ ملنے جاتے ہیں۔ لیکن اس سال ، روایت کے برخلاف ، کووڈ ۔19 کی وجہ سے کمی واقع ہوئی ہے۔

گزشتہ سال ، ملک میں مسافروں کی باقاعدہ پروازیں 25 مارچ سے دو ماہ کے لیے مکمل طور پر بند کردی گئیں۔ اس کے بعد ، 25 مئی 2020 سے گھریلو راستوں پر باقاعدہ پروازیں دوبارہ شروع کی گئیں۔ 2021 فروری تک ہر ماہ مسافروں کی تعداد میں اضافہ ہوتا رہا۔ فروری میں یہ تعداد 78.27 لاکھ ہوگئی۔ مارچ میں وبا کی دوسری لہر کی وجہ سے معمولی کمی کے ساتھ یہ تعداد 78.22 لاکھ ہوگئی۔ اپریل میں اس وبا کے بھیانک شکل لیتے ہی اس میں 27 فیصد کمی واقع ہوئی۔