پٹنہ، 22 جولائی(انڈیا نیرٹیو)

بہار میں پنچایت انتخابات میں پہلی بار ای وی ایم کا استعمال کیا جائے گا۔ اس کے لیے بدھ کو ای وی ایم تمام اضلاع میں پہنچ گئیں۔ ریاستی الیکشن کمیشن نے گزشتہ جائزہ میٹنگ کے دوران تمام اضلاع کو 20 جولائی تک دیگر ریاستوں سے ای وی ایم لانے کی ہدایت کی تھی۔ریاست میں پنچایت انتخابات کے دوران مجموعی طور پر دو لاکھ 09 ہزار ای وی ایم استعمال ہوں گے۔ ای وی ایم کے توسط سے مکھیا، وارڈ ممبر، پنچایت سمیتی ممبر اور ضلع پریشد کے چار عہدوں پر ووٹنگ ہوگی۔ جب کہ دو عہدوں، پنچ اور سرپنچ کے لئے ووٹنگ بیلٹ باکس کے ذریعے کی جانی ہے۔

ریاستی الیکشن کمیشن کے سکریٹری یوگیندر رام نے بتایا کہ ریاست کے تمام اضلاع میں ای وی ایم پہنچ چکے ہیں، کچھ راستے میں ہیں، جو 24 سے 48 گھنٹوں میں متعلقہ اضلاع میں پہنچ جائیں گے۔ انہوں نے کہا کہ 30 اضلاع میں ای وی ایم پہلے ہی پہنچ چکی ہیں۔ آٹھ میں سے سات اضلاع میں متعلقہ ریاستوں سے ای وی ایم آسانی سے دستیاب تھے۔ جب کہ واحد شیخ پورہ کے لئے ای وی ایم لینے میں تمل ناڈو میں تھوڑی پریشانی ہوئی۔ انہوں نے بتایا کہ ای وی ایم کو دوسری ریاست میں بھیجنے کے قبل تمل ناڈو حکومت نے ای ایم ایس (جانچ) کرانے کی ضرورت ہے۔

انہوں نے بتایا کہ اس عمل میں تھوڑی تاخیر ہوئی ہے، وہاں سے آخر کار ای وی ایم بھی مل گئے ہیں۔ ذرائع کے مطابق ریاست میں پنچایت انتخابات کے لیے دو لاکھ 09 ہزار ای وی ایم لائے گئے ہیں۔ تمام ای وی ایم گودام میں محفوظ رکھے گئے ہیں۔ تمام ای وی ایم کو کمیشن کی ہدایت کے مطابق استعمال کے لیے دوبارہ آزمایا جائے گا۔