نئی دہلی،6 جنوری (اندیا نیرٹیو)

 دہلی سمیت پورا شمالی ہندوستان شدید سردی کی گرفت میں ہے۔ اس وقت دہلی میں ملک کے ہل اسٹیشنوں سے بھی زیادہ سردی ہے۔ جمعرات کو دہلی کا کم از کم درجہ حرارت 3 ڈگری سیلسیس تک پہنچ گیا، جب کہ تین مقامات پر یہ 2.2 سے 2.8 ڈگری سیلسیس ریکارڈ کیا گیا۔

جمعرات کو ڈلہوزی کا کم از کم درجہ حرارت 4.9 ڈگری سیلسیس، دھرم شالہ میں 5.2 ڈگری سیلسیس، کانگڑا میں 3.2 ڈگری سیلسیس، شملہ میں 3.7 ڈگری سیلسیس، دہرادون میں 4.6 ڈگری سیلسیس، مسوری میں 4.4 ڈگری سیلسیس اور نینی تال میں 4.4 ڈگری سیلسیس ریکارڈ کیا گیا۔

ہندوستان کے محکمہ موسمیات کے مطابق، دارالحکومت کے کچھ علاقوں کو 6 اور 7 جنوری کو بھی سرد لہر کا سامنا کرنا پڑے گا۔ اس دوران کم سے کم درجہ حرارت 4 ڈگری سیلسیس کے آس پاس درج کیا جا سکتا ہے۔ اسی لیے سرد لہر کا ایلو الرٹ جاری کیا گیا ہے۔

اسکائی میٹ ویدر کے نائب صدر (موسم سائنس اور موسمیاتی تبدیلی) مہیش پلاوت کے مطابق نئے سال تک پہاڑوں پر جو برف باری ہوئی ہے۔ شمال مغربی ہواؤں کے ذریعے اسی کی ٹھنڈک دہلی کو سرد بنا رہی ہے۔ ابھی دو دن تک کولڈ ڈے والی حالت بنی رہے گی۔