ممبئی، 10 جولائی (انڈیا نیرٹیو)

مہاراشٹرا حکومت نے فون ٹیپنگ کے الزامات کی تحقیقات کے لئے ریاستی ڈائریکٹر جنرل پولیس سنجے پانڈے کی سربراہی میں تین رکنی انکوائری کمیٹی تشکیل دی ہے۔ یہ کمیٹی تین ماہ میں اپنی رپورٹ پیش کرے گی۔ یہ کمیٹی کچھ اہم سیاسی افراد کے 2015 سے 2019 کے دوران غیر قانونی فون ٹیپنگ کی تحقیقات کرے گی۔ یہ فیصلہ وزیر داخلہ دلیپ والسے پاٹل نے جمعہ کی رات دیر گئے لیا ہے۔

مقننہ کے حالیہ دو روزہ مون سون اجلاس میں حکمران جماعت کے اراکین اسمبلی نے پچھلی فڈنویس حکومت میں نامور سیاسی شخصیات کے فونوں کے غیر قانونی ٹیپنگ کا معاملہ اٹھایا۔ کانگریس کے ریاستی صدر نانا پاٹول نے الزام لگایا تھا کہ سال 2016-17 میں جب وہ رکن پارلیمنٹ تھے تو ان کافون  ٹیپ کیاگیاتھا۔

 انہوں نے اس کی اعلی سطح کی تحقیقات کا مطالبہ کیا تھا۔ اس پر، وزیر داخلہ پاٹل نے معاملے کی تحقیقات کے لیے ایک کمیٹی تشکیل دینے کی یقین دہانی کرائی تھی۔ وزیر داخلہ نے جمعہ کے روز سینئر پولیس افسران کا اجلاس طلب کیا تھا اور دیر رات اس معاملے کی تحقیقات کے لئے تین رکنی کمیٹی تشکیل دینے کا فیصلہ کیا۔ وزیر داخلہ پاٹل نے کہا کہ فون ٹیپنگ کیس کی مکمل تحقیقات کی جائیں گی اور اس کی سچائی کو عوام کے سامنے لایا جائے گا۔

وزارت داخلہ کے حکم میں کہا گیا ہے کہ فون ٹیپنگ کے الزامات کی تحقیقات کے لیے ڈائریکٹر جنرل پولیس سنجے پانڈے کی سربراہی میں ایک اعلی سطحی کمیٹی تشکیل دی گئی ہے۔ کمشنر ریاستی انٹلیجنس ڈیپارٹمنٹ اور ایڈیشنل کمشنر آف پولیس (اسپیشل برانچ) اس تین رکنی کمیٹی کا حصہ ہوں گے۔