لکھنؤ / غازی پور ، 04 اپریل (انڈیا نیرٹیو)

ایم ایل اے مختار انصاری کو سپریم کورٹ کی ہدایت پر روپڑ جیل سے اترپردیش واپس لایا جارہا ہے۔ حکومت پنجاب کا ایک خط ایڈیشنل چیف سکریٹری ہوم اونیش کمار اوستھی کو موصول ہوا ہے۔ خط میں لکھا گیا ہے کہ مختار انصاری 8 اپریل سے قبل اترپردیش حکومت کے حوالے کردیا جایے گا۔ بہوجن سماج پارٹی کے موٗ سے ایم ایل اے مختار انصاری کی منتقلی کے سلسلہ میں پنجاب حکومت نے اترپردیش حکومت کو ایک خط لکھا ہے۔ مختار انصاری کو اترپردیش کی باندہ جیل میں رکھا جائے گا۔ وہاں سیکورٹی انتظامات سخت کردیئے گئے ہیں۔

باندہ جیل کے باہر پولیس کی دو چوکیاں قائم کردی گئی ہیں ، جہاں پی اے سی کی بٹالین تعینات کردی گئی ہے۔ حکومت پنجاب کے ایڈیشنل چیف سکریٹری ہوم نے اترپردیش کے ایڈیشنل چیف سکریٹری داخلہ اونیش کمار اوستھی کو ایک خط لکھا ہے۔ اس خط میں مختار انصاری کو 8 اپریل سے قبل ہینڈ اوور کرنے کی بات کہی گئی ہے۔ مختار انصاری اس وقت پنجاب کے ضلع روپڑ کی روپ نگر جیل میں بند ہیں ، 8 اپریل کو اترپردیش پولیس کے حوالے کردیئے جائیں گے۔

 باندہ جیل منتقل ہونے کے بعد ، مختار انصاری ویڈیو کانفرنسنگ کے ذریعے 12 اپریل کو پنجاب کے کیس میں پیش ہوں گے۔ ایڈیشنل چیف سکریٹری داخلہ پنجاب حکومت نے اپنے خط میں مختار انصاری کی خراب صحت کا بھی حوالہ دیا ہے۔ خط میں لکھا گیا ہے کہ مختار انصاری کے حوالے کرتے وقت سیکیورٹی اور طبی انتظامات کے مناسب انتظامات  کئے جائیں۔