سنٹرل وقف بورڈ کے چیئرمین رئیس خان پٹھان نے گوکل پور کے شیو مندر میں پوجا کی
سنٹرل وقف بورڈ کے چیئرمین رئیس خان پٹھان منگل کے روز پڑوسی گاوں گوکل پور پہنچے۔ انہوں نے وہاں مہابھارت عہد کے قدیم شیو مندر میں شیو لِنگ پر جلابھیشیک کیا۔ جونا اکھاڑہ کے مہنت اور مندر سنچالک دھیرج گری مہاراج سمیت دیگر روشن خیال دیہاتیوں نے روایتی طور پر رئیس خان کا استقبال کیا۔ اس موقع پر پٹھان نے کہا کہ ملک کی یکجہتی اور سالمیت وزیر اعظم نریندر مودی کے ہاتھ میں محفوظ ہے۔ اب کوئی سیاسی خود غرضی کے لیے ہندو اور مسلم کے درمیان خلیج پیدا نہیں کر سکتا۔ ایسے لوگوں کو سمجھ لینا چاہیے کہ اب ہندوستان میں کوئی جناح پیدا نہیں ہوگا۔
پٹھان نے بھگوان شنکر سے سب کی فلاح و بہبود اور ملک کے اتحاد و سالمیت اور لوگوں کو کورونا وبا سے بچانے کی دعا کی۔انہوں نے مزید کہا کہ وزیر اعظم مودی کا پیغام ہے کہ ہندوستان پیار،محبت، پریم کا ملک ہے۔ یہی دنیا میں ہندوستان کے اتحاد اور سالمیت کی مضبوط پہچان ہے۔ مٹھی بھر لوگ مذہب کے نام پر لوگوں کو لڑاتے ہیں۔ مودی کے دور حکومت میں اس قسم کی سوچ اور نظریے کے لوگوں کو روکا گیا ہے۔
خاص طور پر اتر پردیش کا ذکر کرتے ہوئے انہوں نے کہا کہ اب وہاں سے اس طرح کی نفرت پھیلانے والی طاقتیں ختم ہو گئی ہیں۔ یوپی میں یوگی حکومت نے مذہبی جنون پھیلانے والوں پر شکنجہ کسا ہے۔
