سوپور اور بانڈی پورہ میں ثقافتی سرگرمیوں کے پروگرام منعقد کیے گئے

پولیس شہداء کی قربانیوں کی یاد میں پولیس یادگاری ہفتہ کے ایک حصے کے طور پر، پولیس نے گاندربل میں تقریبات کے سلسلے کا آغاز کیا ہے۔ اس کے علاوہ سوپور اور بانڈی پورہ میں ثقافتی سرگرمیوں کے پروگرام منعقد کیے ہیں۔

گاندربل میں، ایس ایس پی گاندربل نکھل بورکر-آئی پی ایس نے ڈی پی ایل گاندربل میں جموں و کشمیر پولیس کے شہداء کی یاد میں تقریبات کی 10 روزہ طویل سیریز کا افتتاح کیا۔

تقریبات کا سلسلہ ثقافتی پروگرام سے شروع ہوا جس میں ضلع کے مختلف سکولوں کے طلبا نے شرکت کی۔شرکا نے مختلف ثقافتی پروگرام پیش کیے جن کا مقصد طلبا، نوجوان ابھرتے ہوئے اور پرجوش فنکاروں کو اپنی صلاحیتوں کا مظاہرہ کرتے ہوئے ایک پلیٹ فارم فراہم کرنا تھا۔

ضلع کے مختلف سکولوں کے شرکاء نے ڈانس پرفارمنس، حب الوطنی اور لوک گیت گا کر اپنی صلاحیتوں کا مظاہرہ کیا۔ انہوں نے افسانوی ڈرامے، مختصر خاکے اور دیگر ثقافتی سرگرمیاں بھی پیش کیں۔ شرکا کی پرفارمنس دیکھ کر شائقین مسحور ہو کر رہ گئے۔

یہ پورا پروگرام جموں و کشمیر پولیس کے بہادر شہداء کی ہمت اور بہادری کو یاد کرنے کے لیے وقف تھا جنہوں نے قوم کے اتحاد اور سالمیت کے ساتھ ساتھ لوگوں کے جان و مال کے تحفظ کے لیے اپنی جانیں نچھاور کیں۔

اس کے علاوہ، ڈی وائی ایس پی ہیڈکوارٹر گاندربل، ڈی وائی ایس پی (پی)، پولیس اور محکمہ تعلیم کے دیگر افسران اور لوگوں کی بڑی تعداد نے اس پروگرام کو دیکھا۔بعد ازاں ایس ایس پی گاندربل اور محکمہ پولیس اور تعلیم کے دیگر افسران نے شرکا کو نقد انعامات اور ٹرافیوں سے نوازا۔