صدر جمہوریہ ہند جناب رام ناتھ کووند نے آج (3 جون 2022) وزیر اعظم جناب نریندر مودی کے ساتھ کانپور دیہات میں اپنے آبائی گاؤں پرونکھ میں پتھری ماتا مندر اور  ملن کیندر کا دورہ کیا۔ دونوں لیڈروں نے ڈاکٹر بھیم راؤ امبیڈکر کے مجسمہ پر  خراج  عقیدت بھی پیش کیے اور گاؤں میں ایک عوامی جلسے سے خطاب کیا۔

 اس موقع پر خطاب کرتے ہوئے صدر جمہوریہ نے اپنے آبائی گاؤں میں آنے کی دعوت قبول کرنے کے لیے وزیر اعظم جناب نریندر مودی کا شکریہ ادا کیا۔ انہوں نے کہا کہ نہ صرف ان کے گاؤں بلکہ ان کے ضلع کو بھی ان کی شاندار موجودگی نے متاثر کیا ہے۔

 صدر جمہوریہ نے کہا کہ وزیراعظم ہر شہری کی زندگی آسان بنانے کے لیے مسلسل کوشاں ہیں۔ انہوں نے مادر ہند کی خدمت کے معنی کو نئی جہتیں دی ہیں۔ انہوں نے قومی خدمت اور عوامی بہبود کے تصور کو بھی نئے معنی عطا کیے ہیں۔

 انہوں نے کہا کہ جیسا کہ ہم سب جانتے ہیں کہ باباصاحب نے ہندوستانی ثقافت پر مبنی ایک جامع اور ہم آہنگ معاشرے کی تعمیر اور معاشرے کے غریب، پسماندہ اور محروم طبقات کی بہتری کے لیے اپنی پوری زندگی جدوجہد کی۔ انہوں نے کہا کہ وزیراعظم نے جس طرح بابا صاحب کے نظریات کو عملی جامہ پہنایا ہے وہ ہم سب کے لیے مثالی ہے۔

 اپنے دورہ جاپان کے دوران وزیر اعظم کے اس  خطاب کا  بھی صدر جمہوریہ نے ذکر کیا جس میں  انہوں نے کہا تھا کہ ’’وہ مکھن پر نہیں بلکہ پتھروں پر لکیریں کھینچنا پسند کرتے ہیں’’ صدر نے کہا کہ وزیر اعظم کے کردار کی یہی مضبوطی آج عالمی سطح پر ہندوستان کو ایک طاقت کے طور پر قائم کر رہی ہے۔ اپنی غیر معمولی کوشش اور محنت کے بل بوتے پر انہوں نے ملک کے  فخر اور وقار کو بلند کیا۔ ہم سب کو بھارت  ماتا کے ایسے  سپوت پر فخر ہے۔