یوپی کے پانچ شہروں میں تالا بندی کے فیصلے پر سپریم کورٹ کی پابندی

سپریم کورٹ نے کورونا وائرس کی عالمی وبا کے تیزی سے پھیلنے کے سبب اترپردیش کے پانچ شہروں میں لاک ڈاؤن نافذ کرنے کے الہ آباد ہائی کورٹ کے فیصلے پر منگل کے روز روک لگادی ہائی کورٹ نے حکومت اتر پردیش کو کورونا وائرس کی سنگین صورتحال کے پیش نظر پریاگراج، لکھنؤ، کانپور ، بنارس اور گورکھپور میں 26 اپریل تک مکمل تالا بندی نافذ کرنے کی ہدایت دی تھی۔

چیف جسٹس شرد اروند بوبڑے، جسٹس اے ایس بوپنا اور جسٹس وی رما سبرمنیم پر مشتمل ڈویژن بنچ نے سالیسٹر جنرل تشارمہتا کے دلائل سننے کے بعد ہائي کورٹ کےفیصلے پر عملدرآمد روک دی اور دو ہفتوں کے بعد معاملے کی سماعت کا فیصلہ کیا۔

حکومت اترپردیش کی جانب سے پیش ہونے والے مسٹر تشار مہتا نے دلیل دی کہ عدالتی حکم کے ذریعے پانچ شہروں میں مکمل تالا بندی انتظامی مشکلات کا سبب بنے گی۔

دریں اثناء، عدالت عظمی نے ریاستی حکومت کو اگلی سماعت تک کورونا وائرس کی وبا سے نمٹنے کے لیے کی جانے والی کوششوں کی معلومات فراہم کرنے کی ہدایت دی۔

مسٹر تشار مہتا نے اتر پردیش حکومت کی جانب سے آج صبح اس معاملے کا خصوصی ذکر کرکے اس کی جلد سماعت کرنے کی درخواست کی تھی، جسے بنچ نے قبول کرلیا اور پہلے سے درج تمام مقدموں کی سماعت کے بعد ریاستی حکومت کی اپیل پر غور کیا۔بنچ نے سینئر ایڈووکیٹ پی ایس نرسمہا کو اس معاملے میں رفیق عدالت مقرر کیا۔

پانچ شہروں میں لاک ڈاؤن لگانے کے ہائی کورٹ کے حکم کے خلاف سپریم کورٹ جائے گی حکومت

اترپردیش کی یوگی حکومت الہ آباد ہائی کورٹ کے پانچ شہروں میں لاک ڈاؤن نافذ کرنے کے فیصلے کے خلاف سپریم کورٹ میں جائے گی اور سپریم کورٹ سے درخواست کرے گی کہ جلد سے جلد اس کی درخواست پر سماعت کی جائے وزیر اعلیٰ یوگی آدتیہ ناتھ نے آج کہا کہ ریاست میں کورونا کیسز میں اضافہ ہوا ہے ، قابو پانے کے لیے بھی سختی ضروری ہے۔ حکومت نے بہت سخت اقدامات اٹھائے ہیں ، مزید اقدامات اٹھائے جارہے ہیں۔ زندگی کے ساتھ ساتھ غریبوں کی روزی بھی بچانی ہے۔ لہذا ، شہروں میں ابھی پورا لاک ڈاؤن نہیں ہوگا۔

الہ آباد ہائی کورٹ نے گزشتہ روز 26 اپریل تک لکھنؤ ، کانپور ، پریاگراج ، وارانسی اور گورکھپور میں لاک ڈاؤن کا حکم دیتے ہوئے کہا تھا کہ ، ایک مہذب معاشرے میں ، اگر صحت عامہ کا نظام چیلنجوں کا مقابلہ کرنے کے قابل نہیں ہے اور لوگ مناسب علاج کی کمی مر رہے ہیں ، اس کا مطلب یہ ہے کہ مناسب ترقی نہیں ہوئی ہے۔ صحت اور تعلیم الگ تھلگ ہوگئی ہے۔ موجودہ منتشر صحت کی خدمات کے لیے حکومت کو ذمہ دار ٹھہرایا جانا چاہیے۔

ریاست میں لاک ڈاؤن کی کوئی ضرورت نہیں:اترپردیش حکومت

اترپردیش حکومت نے کہا ہے کہ ریاست میں لاک ڈاؤن کی کوئی ضرورت نہیں ہے۔ الٰہ آباد ہائی کورٹ نے کَل ریاستی حکومت کو ہدایت دی تھی کہ 5 شہروں میں لاک ڈاؤن نافذ کیا جائے، اِن میں لکھنؤ، کانپور، وارانسی، پریاگ راج اور گورکھپور شامل ہیں۔ 

یوپی گورنمنٹ نے بتایا ہے کہ زندگی بچانے کے ساتھ ساتھ غریب لوگوں کی روزی کا بھی تحفظ کرنا ضروری ہے۔ اس لیے اِن شہروں میں مکمل لاک ڈاؤن نہیں ہوگا۔ ریاستی حکومت نے یہ بھی کہا ہے کہ لوگ بہت سی جگہوں پر رضاکارانہ طور پرShutdownکررہے ہیں۔