ممتا کے دلی دورے کے حوالے سے سوشل میڈیاپرطنزیہ پوسٹوں کی بھرمار

https://urdu.indianarrative.com/Mamata_Banerjee.png

مغربی بنگال کی وزیر اعلیٰ ممتا بنرجی

کولکاتہ، 29 جولائی (انڈیا نیرٹیو)

مغربی بنگال کی وزیر اعلی ممتا بنرجی پانچ روزہ دہلی کے دورے پر ہیں جہاں وہ بی جے پی کے خلاف اپوزیشن جماعتوں کو متحرک کرنے کی کوشش کررہی ہیں۔ 2021 کے اسمبلی انتخابات میں زبردست کامیابی کے بعد، ترنمول کانگریس قومی سطح پر ممتا بنرجی کو ترقی دینے اور 2024 کے لوک سبھا انتخابات کے دوران اپوزیشن کا چہرہ پیش کرنے کی کوشش کررہی ہے۔

اس دورے سے متعلق دلچسپ کارٹون اور تبصرے سوشل میڈیا پر پوسٹ کیے جارہے ہیں۔ کچھ لوگ ممتا کے دلی کے دورے کو رانو منڈل کے ریلوے اسٹیشن پر گانا گانے کے لئے ممبئی کے دورے سے تشبیہ دے رہے ہیں۔ ایک صارف نے فیس بک پر ایک تصویر شائع کی ہے جس میں رانو منڈل اوپر ہے اور ممتا بنرجی نیچے ہے۔ اس میں لکھا ہے رانومنڈل لتا منگیشکر بننے کے خواب کے ساتھ ممبئی گئی تھی، اسی طرح  ممتا بنرجی وزیر اعظم بننے کے خواب کے ساتھ دہلی گئی ہیں۔

اسمبلی انتخابات کے دوران ممتا بنرجی اور ان کی پارٹی نے وزیر اعظم نریندر مودی سے لے کر بھارتیہ جنتا پارٹی کے اعلی قائدین کو بیرونی لوگوں کا درجہ دے دیا تھا۔ ممتا کے دہلی کے دورے کے بارے میں اب ایک شخص نے فیس بک پر لکھا ہے کہ جب ممتا دہلی آتی ہے توکیا وہ اپنے گھر آتی ہے، جب وزیر اعظم بنگال جاتے ہیں تو وہ بیرونی آدمی بن جاتے ہیں۔ اسی طرح ممتا بنرجی کی تصویر کو بنگال کے ہر ضلع میں ہر کامیابی میں ڈالنے کی روایت کو بھی سوشل میڈیا پر تنقید کا نشانہ بنایا گیا ہے۔ یہ لکھا گیا ہے کہ اگر میرابائی  چانو بنگال کی رہائشی ہوتی تو کتنے پوسٹر لگے ہوتے جس میں میرابائی نے کسی اور کے چہرے کی جگہ لی ہوتی۔

جب اس سلسلے میں پوچھا گیا تو ترنمول کانگریس کے ایک رہنما نے "ہندوستان سماچار" کو بتایا کہ ہم سب جانتے ہیں۔ کچھ لوگوں کو ممتا بنرجی سے نفرت ہے اوروہ اسی کا اظہار کر رہے ہیں۔ اسمبلی انتخابات سے قبل بھی سوشل میڈیا پر ممتا بنرجی کے خلاف گستاخانہ الفاظ استعمال کیے گئے تھے۔ سبھی جانتے ہیں کہ اس کا نتیجہ کیا ہوا۔