سری نگر میں ایشیا کا سب سے بڑا ٹیولپ گارڈن 19 مارچ کو عوام کے لیے کھول دیا جائے گا، یہ جانکاری متعلقہ محکمے کے افسران نے دی ہے۔ متعلقہ محکمہ کے ایک  اہلکار نے بتایا کہ باغ کو 19 مارچ کو ایک شاندار افتتاحی تقریب کے دوران کھولا جائے گا۔

انہوں نے کہا کہ اس سال ایشیا کے سب سے بڑے ٹیولپ باغ میں مختلف اقسام کے 16 لاکھ سے زائد ٹیولپس کھلیں گے جبکہ گزشتہ سال یہ تعداد 15 لاکھ تھی۔اہلکار نے کہا کہ تمام تیاریاں مکمل کر لی گئی ہیں اور متعلقہ محکمہ اب باغ کے شاندار افتتاح کو حتمی شکل دے رہا ہے۔

 دریں اثنا، کمشنر سیکرٹری فلوریکلچر ڈیپارٹمنٹ شیخ فیاض نے تصدیق کی کہ باغ کو 19 مارچ کو عوام کے لیے کھول دیا جائے گا۔ انہوں نے کہا کہ اس سال مختلف اقسام کے 16 لاکھ سے زائد ٹیولپس کھلیں گے اور باغ کو ایک تہوار کا روپ دیں گے انہوں نے مزید کہا کہ ہمیں امید ہے کہ اس سال ایشیا کے سب سے بڑے ٹیولپ گارڈن میں سیاحوں کی بڑی تعداد میں آمد ہو گی۔

انہوں نے یہ بھی کہا کہ اس سال انہوں نے باغ کے اندر ایک واٹر چینل اور چلتے پھرتے فوارے بنائے ہیں جو اس کی خوبصورتی میں اضافہ کریں گے۔  امید ہے کہ سری نگر کا ٹیولپ گارڈن اپنے افتتاح کے بعد سے وادی کے اہم سیاحوں کی توجہ کا مرکز بن سکتا ہے۔