ڈل اور نگین جھیلوں کے کنارے کل سے شروع ہونے والا دو روزہ ہاؤس بوٹ فیسٹیول آج شام اختتام پذیر ہوگیا۔ اس میلے کا اہتمام محکمہ سیاحت نے کیا تھا۔   دو روزہ میلے کے دوران ان دونوں جھیلوں پر ہاؤس بوٹس کی ہیریٹیج ویلیو پر زور دیا گیا۔ ڈل اور نگین جھیلوں میں تقریباً 900 ہاؤس بوٹس ہیں۔

دو روزہ میلے میں آنے والوں کو ہاؤس بوٹس کی تاریخ، ان میں ٹھہرنے والی مشہور شخصیات اور کئی دہائیوں سے دنیا بھر کے سیاحوں کو راغب کرنے میں ہاؤس بوٹس کے منفرد کردار کے بارے میں بتایا گیا۔

فیسٹیول میں مقامی موسیقی، خوراک، فن، ثقافت کے علاوہ مقامی لوک فنکاروں نے لیزر شو اور لائیو کنسرٹ کے دوران اپنے فن کا مظاہرہ کیا۔دو روزہ فیسٹیول کی اہم جھلکیاں لائیو میوزک کی نمائش، آرٹ گیلری کے علاوہ مختلف پکوان اور کھانوں کی خصوصیات کی نمائش تھی۔

روایتی لوک موسیقی، ایک تیرتا ہوا اسٹیج اور ڈل کے پانی پر واٹر اسکرین، روشن شکارا کارنیول اور مقامی میوزیکل بینڈز کی لائیو میوزیکل پرفارمنس بھی دو روزہ میلے کا حصہ تھی۔

اس موقع پر سیکرٹری سیاحت سرمد حفیظ نے کہا کہ ہاؤس بوٹ فیسٹیول کے انعقاد کا مقصد آنے والے موسم سرما کے سیاحتی سیزن کی تقریبات کا آغاز کرنا ہے۔ انہوں نے امید ظاہر کی کہ یہ تہوار وادی میں سردیوں کے دوران سیاحت کے ایک بہترین موسم کا مرکز ثابت ہوگا اور اس کے علاوہ ہاؤس بوٹس سے وابستہ امیر ورثے اور یادداشت کے بارے میں لوگوں میں فخر کے احساس کو زندہ کرے گا۔