نائب صدر جمہوریہ جناب ایم وینکیا نائیڈو نے آج ہندوستانی جمہوریت کے تحفظ اور مضبوطی کے لیے اقدار پر مبنی اور اخلاقی سیاست کو فروغ دینے کی ضرورت پر زور دیا۔

عوامی زندگی میں گرتے ہوئے معیار پر اپنی تشویش کا اظہار کرتے ہوئے جناب نائیڈو نے عوامی نمائندوں کو تاکید کی کہ وہ اپنے سیاسی مخالفین پر ذاتی حملے کرنے سے گریز کریں۔ انھوں نے اہم قومی معاملات پر تمام اسٹیک ہولڈرز کے ساتھ اتفاق رائے پیدا کرنے کی ضرورت پر زور دیا اور نوجوان اور آنے والے سیاستدانوں کو مشورہ دیا کہ وہ مختلف معاملات پر اصولی موقف اختیار کریں۔

آندھرا پردیش کے مچلی پٹنم میں کرشنا ضلع پریشد کے سابق چیئرمین آنجہانی شری پنامنی کوٹیشور راؤ کے مجسمے کی نقاب کشائی کرتے ہوئے جناب نائیڈو نے کہا کہ شری کوٹیشور راؤ نے ضلع پریشد کے چیئرمین کی حیثیت سے لوگوں کے ذہنوں پر ایک لازوال نقش چھوڑا ہے، اور دو دہائیوں سے زیادہ عرصے تک انھوں نے اس عہدے کو برقرار رکھا۔ انھوں نے ثابت کیا کہ غیر مرکزی جمہوریت لوگوں کو ترقیاتی فوائد پہنچا سکتی ہے۔

نوجوان سیاست دانوں کو وہ شری کوٹیشور راؤ کی تقلید کرنے کی تاکید کرتے ہوئے، جناب نائیڈو نے کہا کہ سیاسی جماعتوں کو لوگوں کا اعتماد برقرار رکھنے کے لیے اپنے انتخابی منشور میں معقول اور عملی وعدے کرنے چاہئیں۔ بصورت دیگر عوام کا انتخابی جمہوریت سے اعتماد اٹھ جائے گا۔ انھوں نے انتخابات کے دوران مفت میں دی جانے والی چیزوں کے وعدوں اور انتخابی منشور کو قانونی طور پر پابند بنانے کے امکان پر وسیع تر بحث کا مطالبہ کیا۔

نائب صدر جمہوریہ نے مشورہ دیا کہ لوگوں کو اپنی شرکت صرف پانچ سال میں ایک بار ووٹ ڈالنے تک محدود نہیں رکھنا چاہیے بلکہ منتخب نمائندوں اور حکومت سے مسلسل سوال اور جوابدہی کا مطالبہ کرنا چاہیے۔ انھوں نے کہا کہ لوگوں کو اپنے نمائندوں کا انتخاب 4Cs کی بنیاد پر کرنا چاہیے – ’کردار، اہلیت، صلاحیت اور طرز عمل‘ کی بنیاد پر نہ کہ ’ذات، برادری، پیسے اور جرم کی بنیاد پر، جسے کچھ لوگ فروغ دینے کی کوشش کر رہے ہیں۔

جناب نائیڈو نے ایک زیادہ ذمہ دار میڈیا پر زور دیا جو سنسنی خیزی سے گریز کرے اور معروضی انداز میں معاشرے کے حالات کی عکاسی کرے۔

اس موقع پر آندھرا پردیش کے ہاؤسنگ منسٹر جناب جوگی رمیش، کرشنا ضلع زیڈ پی کے چیئرمین جناب اپلا ہری کرشنا، وجے واڑہ کے ایم پی جناب کیسینی سری نواس، ایم ایل اے جناط پرنی وینکٹ رامیا اور جناط سمینی ادے بھانو، مچلی پٹنم میونسپل کارپوریشن کے میئر جناب موکا وینکٹیش ورما، سابق چیف ویجیلنس کمشنر جناب کے وی چودھری، آندھرا پردیش کے سابق وزیر جناب پنامنی وینکٹیشور راؤ اور دیگر موجود تھے۔