آج 11 اگست منفرد لب و لہجہ کے انقلابی مشہور و معروف شاعر راحت اندوری کا یوم وفات ہے
ترتیب و پیشکش :سید نوید جعفری حیدرآباد دکن
مقبول عام شاعر محترم راحت اندوری صاحب یکم جنوری 1950ء کو اندور میں پیدا ہوئے تھے وہ ایک ٹیکسٹائل مل کے ملازم رفعت اللہ قریشی اور مقبول النساء بیگم کی چوتھی اولاد تھے ان کی ابتدائی تعلیم نوتن اسکول اندور میں ہوئی راحت اندوری نے اسلامیہ كريميہ کالج اندور سے 1973ء میں اپنی بیچلر کی تعلیم مکمل کی اس کے بعد 1975ء میں انہوں نے بركت اللہ یونیورسٹی، بھوپال سے اردو ادب میں ایم اے کیا 1985ء میں انہوں نے اعلٰی ترین تعلیمی سند کے لیے مدھیہ پردیش کی مدھیہ پردیش بھوج اوپن یونیورسٹی سے اردو ادب میں پی ایچ ڈی کی ڈگری حاصل کی وہ اردو کے استاد تھے لیکن وہ ایک اچھے گیت کار بھی ثابت ہوئے۔ انہوں نے بالی وڈ کی کئی فلموں کے لیے نغمے لکھے جو مقبول اور زبان زد عام بھی ہوئے ڈاکٹر راحت اندوری نے نہ صرف بالی ووڈ فلموں کے لیے نغمہ نگاری کی بلکہ گلوکاری کے کئی شوز میں بہ طور جج حصہ بھی لیا۔ عام طور پر راحت اندوری کو نئی نسل بطور شاعر ہی پہچانتی ہے، انہوں نے نئی نسل کو کئی رہنمایانہ باتیں بتائیں جو اُن کے فنی سفر ، تلفظ اور گلوکاری میں معاون ثابت ہوئی
ان کا مؤقف تھا کہ ایک اچھا شاعر یا نغمہ نگار بننے کے لیے ضروری ہے کہ ادب کا مطالعہ کیا جائے چاہے وہ کسی بھی زبان میں ہو اسی صورت میں ایک شاعر یا گیت نگار معاشرے کو نئی روشنی دے سکتا ہے
راحت اندوری اسی بات پر یقین رکھتے تھے کہ ایک شاعر کو معروضی صورت حال سے جڑ کر رہنا چاہیے جو شاعر عصری کرب اور معروضی صداقتوں کو جان بوجھ کر نظر انداز کرتا ہے وہ بددیانتی کا مرتکب ہوتا ہے۔ اس کے علاوہ وہ شاعری میں جمالیاتی طرز احساس کو بڑی اہمیت دیتے تھے ان کے خیال میں جمالیاتی طرز احساس کے بغیر شاعری کی روح فنا ہو جاتی ہے۔ راحت اندوری کا اصل میدان غزل تھا اور انہوں نے ندرت خیال اور نکتہ آفرینی کی وجہ سے غزل کو نئے معانی دیے اللہ ان کو غریق رحمت کرے
آپ کی تصانیف میں دھوپ دھوپ، میرے بعد، پانچواں درویش، رت بدل گئی، ناراض، موجود و غیرہ شامل ہیں۔ آپ نے اپنے منفرد انداز بیان، مختصر اور آسان الفاظ میں شعر کہہ کر اردو ادب اور سامعین کے دل جیتے راحت اندوری طویل وقت سے سانس کی بیماری سے متاثر تھے حال ہی میں ان کی کورونا رپورٹ پازیٹیو(COVID-19 Positive) آنے کے بعد انہیں اربندو اسپتال میں داخل کرایا گیا تھا اطلاعات کے مطابق ڈاکٹروں کے مشورے پر پھپھڑوں کا ایکسرے کرایا گیا تو نمونیا کی تصدیق ہوئی تھی اس کے بعد سیمپل جانچ کے لئے بھیجے گئے تھے، جس میں وہ کورونا پازیٹیو پائے گئے روی ڈوسی نے بتایا تھا کہ ان کے دونوں پھپھڑوں میں نمونیا ہے، سانس لینے میں تکلیف کے سبب آئی سی یو میں رکھا گیا تھا ان کو تین بار ہارٹ اٹیک بھی آیا تھا اور شاعر دلنواز راحت اندوری 11/ اگسٹ 2020ء کو چل بسے
لفظ و خیال کی بادشاہت آج ختم ہوئی
اللہ رب العزت مرحوم کے درجات بلند فرمائے
دنیائے ادب کا ایک اور درخشاں ستارہ بجھ گیا
عالمی شہرت یافتہ شاعر راحت اندوری صاحب رضائے الٰہی سے انتقال کر گئے۔ اللھم اغفر!!
ان کی تصانیف کے نام یہ ہیں:’’ دھوپ، دھوپ‘‘، ’’میرے بعد‘‘، ’’پانچواں درویش‘‘، ’’رت بدل گئی‘‘، ’’ناراض‘‘، ’’موجود‘‘ " لمحے لمحے"
منفرد لب و لہجہ کے انقلابی مشہور و معروف شاعر محترم راحت اندوری صاحب کی برسی کے موقع پر انکا منتخب کلام قارئین کی نظر:
ابھی غنیمت ہے صبر میرا
ابھی لبالب بھرا نہیں ہوں
وہ مجھ کو مردہ سمجھ رہا ہے
اسے کہو میں مَرا نہیں ہوں
وہ کہہ رہا ہے کہ کچھ دنوں میں
مٹا کے رکھ دوں گا نسل تیری
ہے اس کی عادت ڈرا رہا ہے
ہے میری فطرت ڈرا نہیں ہوں
۔۔۔۔۔۔۔۔۔۔۔۔۔۔۔۔۔۔
موت کا زہر ہے فضاؤں میں
اب کہاں جا کے سانس لی جائے
۔۔۔۔۔۔۔۔۔۔۔۔۔۔۔۔۔۔
افواہ تھی کہ میری طبیعت خراب ہے
لوگوں نے پوچھ پوچھ کے بیمار کر دیا
دو گز سہی مگر یہ مِری ملکیت تو ہے
اے موت تو نے مجھ کو زمیندار کر دیا
۔۔۔۔۔۔۔۔۔۔۔۔۔۔۔۔۔۔
یہ ضروری ہے کہ آنکھوں کا بھرم قائم رہے
نیند رکھو یا نہ رکھو خواب معیاری رکھو
یہ ہوائیں اڑ نہ جائیں لے کے کاغذ کا بدن
دوستو مجھ پر کوئی پتھر ذرا بھاری رکھو
۔۔۔۔۔۔۔۔۔۔۔۔۔۔۔۔۔۔
دوستی جب کسی سے کی جائے
دشمنوں کی بھی رائے لی جائے
۔۔۔۔۔۔۔۔۔۔۔۔۔۔۔۔۔۔
شاخوں سے ٹوٹ جائیں وہ پتے نہیں ہیں ہم
آندھی سے کوئی کہہ دے کہ اوقات میں رہے
۔۔۔۔۔۔۔۔۔۔۔۔۔۔۔۔۔۔
بہت غرور ہے دریا کو اپنے ہونے پر
جو میری پیاس سے الجھے تو دھجیاں اڑ جائیں
۔۔۔۔۔۔۔۔۔۔۔۔۔۔۔۔۔۔
نئے کردار آتے جا رہے ہیں
مگر ناٹک پرانا چل رہا ہے
۔۔۔۔۔۔۔۔۔۔۔۔۔۔۔۔۔۔
بیمار کو مرض کی دوا دینی چاہئے
میں پینا چاہتا ہوں پلا دینی چاہئے
۔۔۔۔۔۔۔۔۔۔۔۔۔۔۔۔۔۔
گھر کے باہر ڈھونڈھتا رہتا ہوں دنیا
گھر کے اندر دنیا داری رہتی ہے
۔۔۔۔۔۔۔۔۔۔۔۔۔۔۔۔۔۔
مری خواہش ہے کہ آنگن میں نہ دیوار اٹھے
مرے بھائی مرے حصے کی زمیں تو رکھ لے
۔۔۔۔۔۔۔۔۔۔۔۔۔۔۔۔۔۔
بوتلیں کھول کر تو پی برسوں
آج دل کھول کر بھی پی جائے
۔۔۔۔۔۔۔۔۔۔۔۔۔۔۔۔۔۔
زندگی بھر دور رہنے کی سزائیں رہ گئیں
میرے کاسہ میں مری ساری وفائیں رہ گئیں
نوجواں بیٹوں کو شہروں کے تماشے لے اُڑے
گاؤں کی جھولی میں کچھ مجبور مائیں رہ گئیں
بُجھ گیا وحشی کبوتر کی ہوس کا گرم خون
نرم بستر پر تڑپتی فاختائیں رہ گئیں
ایک اک کر کے ہوئے رخصت مرے کنبے کے لوگ
گھر کے سناٹے سے ٹکراتی ہوائیں رہ گئیں
بادہ خانے، شاعری، نغمے، لطیفے، رت جگے
اپنے حصے میں یہی دیسی دوائیں رہ گئیں
۔۔۔۔۔۔۔۔۔۔۔۔۔۔۔۔۔۔
نہ ہمسفر نہ کسی ہمنشیں سے نکلے گا
ہمارے پاؤں کا کانٹا ہمیں سے نکلے گا
اسی گلی میں وہ بھوکا فقیر رہتا تھا
تلاش کیجے خزانہ یہیں سے نکلے گا
میں جانتا تھا کہ زہریلا سانپ بن بن کر
تیرا خلوص میری آستیں سے نکلے گا
بزرگ کہتے تھے ایسا بھی وقت آئے گا
جہاں پہ ڈوبے گا سورج وہیں سے نکلے گا
گزشتہ سال کے زخمو ہرے بھرے رہنا
جلوس اب کہ برس بھی یہیں سے نکلے گا
۔۔۔۔۔۔۔۔۔۔۔۔۔۔۔۔۔۔
روز تاروں کو نمائش میں خلل پڑتا ہے
چاند پاگل ہے اندھیرے میں نکل پڑتا ہے
ایک دیوانہ مسافر ہے میری آنکھوں میں
وقت بے وقت ٹھہر جاتا ہے، چل پڑتا ہے
اپنی تعبیر کے چکر میں میرا جاگتا خواب
روز سورج کی طرح گھر سے نکل پڑتا ہے
روز پتھر کی حمایت میں غزل لکھتے ہیں
روز شیشوں سے کوئی کام نکل پڑتا ہے
اُس کی یاد آئی، سانسو ذرا آہستہ چلو
دھڑکنوں سے بھی عبادت میں خلل پڑتا ہے
۔۔۔۔۔۔۔۔۔۔۔۔۔۔۔۔۔۔
میں آخر کون سا موسم تمہارے نام کر دیتا
یہاں ہر ایک موسم کو گزر جانے کی جلدی تھی
۔۔۔۔۔۔۔۔۔۔۔۔۔۔۔۔۔۔
وہ چاہتا تھا کہ کاسہ خرید لے میرا
میں اس کے تاج کی قیمت لگا کے لوٹ آیا
۔۔۔۔۔۔۔۔۔۔۔۔۔۔۔۔۔۔
میں من کی بات بہت من لگا کے سنتا ہوں
یہ تو نہیں ہے تیرا اشتہار بولتا ہے
کچھ اور کام اسے جیسے آتا ہی نہیں
مگر وہ جھوٹ بہت شاندار بولتا ہے
۔۔۔۔۔۔۔۔۔۔۔۔۔۔۔۔۔۔
مزہ چکھا کے ہی مانا ہوں میں بھی دنیا کو
سمجھ رہی تھی کہ ایسے ہی چھوڑ دوں گا اسے
۔۔۔۔۔۔۔۔۔۔۔۔۔۔۔۔۔۔
گھر سے یہ سوچ کہ نکلا ہوں کہ مر جانا ہے
اب کوئی راہ دکھا دے کہ کدھر جانا ہے
۔۔۔۔۔۔۔۔۔۔۔۔۔۔۔۔۔۔
بہت غرور ہے دریا کو اپنے ہونے پر
جو میری پیاس سے الجھے تو دھجیاں اڑ جائیں
۔۔۔۔۔۔۔۔۔۔۔۔۔۔۔۔۔۔
ہے میرے چاروں طرف بھیڑ گونگے بہروں کی
کسے خطیب بناؤں کسے خطاب کروں
۔۔۔۔۔۔۔۔۔۔۔۔۔۔۔۔۔۔
ہم اپنی جان کے دشمن کو اپنی جان کہتے ہیں
محبت کی اسی مٹی کو ہندوستان کہتے ہیں
میرے اندر سے ایک ایک کر کے سب ہو گیا رخصت
مگر اندر جو باقی ہے اسے ایمان کہتے ہیں
۔۔۔۔۔۔۔۔۔۔۔۔۔۔۔۔۔۔
آنکھ میں پانی رکھو ہونٹوں پہ چنگاری رکھو
زندہ رہنا ہے تو ترکیبیں بہت ساری رکھو
ایک ہی ندی کے ہیں یہ دو کنارے دوستو
دوستانہ زندگی سے موت سے یاری رکھو
۔۔۔۔۔۔۔۔۔۔۔۔۔۔۔۔۔۔
یہ سانحہ تو کسی دن گزرنے والا تھا
میں بچ بھی جاتا تو اک روز مرنے والا تھا
مرے چراغ، مری شب، مری منڈیریں ہیں
میں کب شریر ہواؤں سے ڈرنے والا تھا
۔۔۔۔۔۔۔۔۔۔۔۔۔۔۔۔۔۔
جسم سے ساتھ نبھانے کی مت امید رکھو
اس مسافر کو تو رستے میں ٹھہر جانا ہے
۔۔۔۔۔۔۔۔۔۔۔۔۔۔۔۔۔۔
اب تو ہر ہاتھ کا پتھر ہمیں پہچانتا ہے
عمر گزری ہے ترے شہر میں آتے جاتے
ہم سے پہلے بھی مسافر کئی گزرے ہوں گے
کم سے کم راہ کے پتھر تو ہٹاتے جاتے
۔۔۔۔۔۔۔۔۔۔۔۔۔۔۔۔۔۔
چراغوں کو اُچھالا جا رہا ہے
ہوا پر رعب ڈالا جا رہا ہے
تھے پہلے ہی کئی سانپ آستیں میں
اب اک بچھو بھی پالا جا رہا ہے
ہمی بنیاد کا پتھر ہیں لیکن
ہمیں گھر سے نکالا جا رہا ہے
جنازے پر مرے لکھ دینا یارو
محبت کرنے والا جا رہا ہے
