Urdu News

حج کانفرنس 2023 میں حج 2023 کو آسان بنانے پر زور

مرکزی اقلیتی امور کی وزیر اسمرتی ایرانی کی صدارت میں میٹنگ کا انعقاد

مرکزی اقلیتی امور کی وزیر اسمرتی ایرانی کی صدارت میں میٹنگ کا انعقاد

حج کمیٹی آف انڈیا کے ذریعہ دہلی کے لودھی کمپلیکس میں اسکوپ بلڈنگ دہلی میں حج کانفرنس 2023 میں حج 2023 کو آسان بنانے پر زور دیا گیا ہے۔ مرکزی اقلیتی امور کی وزیر اسمرتی ایرانی کی صدارت میں منعقدہ اس میٹنگ میں حج کوہموار، خوشگوار اور سستا بنانے پر بات کی گئی۔

حج کانفرنس میں ریاستی حج کمیٹی کے چیئرمین اور سی ای اوز، حج کمیٹی آف انڈیا کے سینئر افسران، اقلیتی امور کی وزارت کے حکام، وزارت خارجہ کے حکام، سعودی عرب میں ہندوستان کے سفیر اور قونصل خانوں نے شرکت کی۔

اس موقع پر اجتماع سے خطاب کرتے ہوئے مرکزی وزیر اسمرتی ایرانی نے کہا کہ حج کے سفر کو عازمین حج کی سہولت کے مطابق بنانے ضرورت ہے۔ انہوں نے کہا کہ حج کے سفر کو سستا، آسان اور پرلطف بنانے کی ضرورت ہے، حج کی ادائیگی پر فی حاجی 4 لاکھ روپے خرچ آتا ہے، اسے کم از کم 3 لاکھ روپے تک لائے جانے کی ضرورت ہے۔

سفری مقامات کی تعداد میں اضافہ کرنا تاکہ عازمین حج کے لیے براہ راست اپنے گھروں کے قریب پروازمل سکیں۔ انہوں نے کہا کہ اس سے عازمین حج کو حج کے سفرپر جانے میں آسانی ہوگی۔ میٹنگ میں حج سے متعلق تمام بے ضابطگیوں کی جانچ کا معاملہ بھی سامنے آیا ہے۔

اتر پردیش حج کمیٹی کے چیئرمین محسن رضا نے کہا کہ آج ہونے والی کانفرنس میں اور بھی کئی فیصلے لیے گئے ہیں، جس میں یہ کہا گیا کہ عازمین حج کو دیے جانے والے سامان کے ریٹ کم کرنے یا یہ ذمہ داری عازمین حج پر چھوڑنے کی بھی بات ہوئی ہے۔

Recommended