یہی سزا ہے چراغوں سے آشنائی کی

ہوا سے رابطہ کم کم ہے کیا کیا جائے

مدھیہ پردیش اردو اکادمی ،محکمہ ثقافت کے زیر اہتمام آزادی کا امرت مہوتسو کے تحت تلاش جوہر: خطاب اور ورکشاپ کا انعقاد  17 جولائی، 2022 کو صبح 11 بجے سے کیسروانی سیوا سدن ،دلی ایم پی یوپی ٹرانسپورٹ کے سامنے، ٹکریا ٹولا روڈ،پانی کی ٹنکی سے پہلے، ستنا میں مقامی ضلع کوآرڈینیٹر امبیکا پرساد پانڈے اور انل ایان کے تعاون سے کیا گیا۔ اس پروگرام میں ریوا اور شہڈول ڈیویژن کے مختلف اضلاع سے منتخب تخلیق کاروں نے حصہ لیا۔ ورکشاپ میں خصوصی مقررین طہور منصوری نگاہ اور ارون کمار مشرا کے ذریعے تخلیق کاروں کی رہنمائی کی گئی۔

پروگرام کی شروعات میں فی البدیہہ مقابلہ کے حکم صاحبان طہور منصوری نگاہ اور ارون کمار مشرا کے ذریعے دو طرحی مصرعے دیے گئے جو درج ذیل تھے:

1۔کس زمانے کی بات کرتے ہو

2۔ہمارے ہاتھ میں پرچم ہے کیا کیا جائے

مندرجہ بالا مصرعوں پر نئے تخلیق کاروں کے ذریعے کہی گئی غزلوں اور پھر ان کی پیش کش کی بنیاد پر حکم صاحبان کے متفقہ فیصلے سے عمریہ کے تنمے جے مشرا کو اول، ریوا کی گیتا شکلا کو دوم اور ریوا کے بھرگوناتھ پانڈے کو سوم اعزازات سے نوازا گیا۔

نئے تخلیق کاروں کی پیش کش کے بعد خصوصی مقرر طہور منصوری نگاہ نے اپنے خیالات کا اظہار کرتے ہوئے نئے تخلیق کاروں کی رہنمائی کی۔ انھوں نے شاعری کی باریکیوں اور فنی خصوصیات کے حوالے سے بھی گفتگو کی۔  اس موقع پر دیگر ضلع کوآرڈینیٹرس بھی موجود رہے جن میں سلیم رضا،ریوا اور کلدیپ کمار  عمریہ نے بھی اپنا شاندار کلام پیش کیا۔

جن شعرانے اول، دوم اور سوم مقام حاصل کیا ان کے اشعار درج ذیل ہیں:

یہی سزا ہے چراغوں سے آشنائی کی

ہوا سے رابطہ کم کم ہے کیا کیا جائے

(تنمے جے مشرا)

ان کی یادوں میں ڈوبے رہتے ہیں

بھیگ جانے کی بات کرتے ہو

(گیتا شکلا)

ٹھوکروں میں پلا بڑھا اس کو

آزمانے کی بات کرتے ہو

(بھرگوناتھ پانڈے)

پروگرام کی نظامت کے فرائض انل ایان نے بحسن خوبی ادا کیے۔

پروگرام کے آخر میں اکادمی کی ڈائریکٹر ڈاکٹر نصرت مہدی نے تمام ضلع کوآرڈینیٹرس، خصوصاً امبیکا پرساد پانڈے اور انل ایان کو، حکم صاحبان کو اور تمام شرکا کو شکریہ ارسال کیا۔